Maria Jessica S. Pegarido

c/o Pardo Elementary School, Cebu City

Dugay na kong nangandoy nga moabot ka.

Ako nangaliya sa Kahitas-an nga ihatag ka.

Ug wala ko damha namugna ka sulod sa

Pipila ka bulan sa akong tago-angkan.

Ikaw akong giampingan ug gikahinaman.

Dihang miabot na ang takna nga ikaw

Gikahimugso, nagpasalamat kog dako

Sa Kahitas-an.

Nagtubo ka nga puno sa among pagmahal

Ug giumol sa husto ug maayong pamatasan.

Apan among namatikdan nga lahi ka sa uban

Ug kini dili namo igsapayan, dili mahayan

Kay sa among panimalay naghatag kag kalipay.

Sa imong talento kami gayud nakontento

Kay daghan kag nasayran ug na-imbento.

Dili lang kay maayo ka sa lawak-saringan

Kundi sa balay sab sa nagmahal mong ginikanan

Gidawat ug gihangop ka sa nagmahal mga kamot

Inubanan sa kinasingkasing ug hugot nga pag-ampo.

Padayunon namo ang pag-amuma kanimo

Aron ikaw mahisama sa uban nga panalanginan

Sa Diyos sa Kahitas-an.