CHITO E. GERMINO
Paknaan, Mandaue City, Cebu
Nagsubay ko sa dalan sa kasubo
Karsada sa pakyas nga mga damgo
Diin sila si Polano ug si Polana
Managhalok nga way pamilok
Aron sa kaguol sila makalimot.
Hudyaka karon ug ugma tiyabaw
Naghandom sa gugmang taphaw
Unya sila si Polano ug si Polana
Natumog sa luha ang mga mata
Nag-asoy sa maot nga gugma.
Dinhi kanunay akong hikit-an
Nagsusapinday sa kadalanan
Apan gibilin ko ang akong anino
Sa lalawigang akong natawhan.
Hinulaman lang ang kalipay mo
Dili motunhay sa galamhan mo
Apan sila si Polano ug si Polana
Sigeng nag-awit ug nagsayaw
Dinhi sa dalan sa kasub-anan.