MGA pangaliya nga milagbas sa langit

Maoy sukaranan sa yuta nga nagsangpit.

Ang paglaom nga gihambin ning dughan

Maoy gihulip sa kahaw-ang sa atong larawan.

Sa walog gisawo ang akong danguyngoy

Nangilaba bisan diyutay sa imong kaluoy,

Namasin nga ang huni sa usa ka ulipon

Mahimong saloma nga imong laylayon.

Ugaling, sa gingharian diin ka nagmando

Dili ako takos sa imong tunob mangaliyupo.

Ang mga pinitik sa kabos kong kasingkasing

Dili angay sa halangdon mong kahamilsing.

Apan ngano ba maanyag nga hinalaran

Mga pungpong sa bulak imo mang giayran?

Kon ang silaw sa adlaw gihikaw pa ning kalibutan

Wa untay dughan sa tunukong rosas masamdan.