DIHANG gihanduraw ko ikaw

Mga damgo ko nangibabaw.

Daghang nalimtang mga butang

Mga buluhaton ning kalibutan.

Naglutaw ko sa lawod sa mga damgo

Gamhanan ug malipayong hari ako.

Apan mugna lang kini sa hunahuna

Sa mata kong gapiyong ikaw ang nakita.

Kon makadungog ko sa ngalan mo

Sa kahinam ug kalipay malumos ako.

Mohunong sa iyang panaw ang panahon

Himaya sa kiliran mo akong mahandom.

Sa mga bulak nga daghag mga gihay

Nasud-ong ko ang matahom mong dagway.

Ug diha sa malulot mong mga mata

Ang sidlak sa mga bituon akong nakita.

Ning takna nga gihandom ko ikaw

Kalipay nga walay sama akong natataw

Nga natagamtaman ning galamhan

Ug natugob sa himaya kining dughan.