MGA luha sa aping nangagay

Sa panahon nga nanglabay.

Mga dula milahutay

Sa kalibutang gilaay, nanghayhay.

May mikab-ot sa kadaugan

Sa pag-abot sa katapusan.

Apan ayaw pag-ingon

Nga natapos na ang tanan.

Pabilin ning akong kiliran.

Mga damgo nangapakyas

Kay ang kainit sa dughan mihupas,

Wa kalungtad sa mga kagabhion.

May awit alang sa bulan

Ang gugmang way katapusan.

Ikaw ug ako magtambayayong

Atong mga panumpa di gun-ubon.

Pinitik sa kasingkasing ipadayon

Hangtod sa atong kamatayon.

Dili angay kutluon ang mga bituon

Nga nagpasidlak sa kagabhion.

Way pulos ang panamilit.

Pahiran ta atong mga luha

Hulaton ang samad maalim

Ug mahupay ang kasub-anan.

Sulayan tang maghiusa pagbalik

Ang duha ka kasingkasing.

Laylayon ta ang awit sa gugma

Nga natagik alang natong duha.

Mosilang pa ang Adlaw

Sa laing kabuntagon.

Badlisan ta atong kapalaran

Likayang madagma sa dalan.

Hapsayon maayong relasyon

May ugma pang masaaron.

Way pulos ang panamilit

Nga mohatag lang og kasakit.