HINAY-HINAY na nga nakompleto ang pipila sa mga atraksyon sa Sugbo nga kaniadto sa laing lugar lang o sa laing nasod makita.

Usa niini mao ang Cebu Safari & Adventure Park nga anaa mahimutang sa lungsod sa Carmen diin mao kini ang labing una nga premier Safari Park sa nasod diin motigi kini sa ubang animal parks ug zoo sa tibuok kalibutan.

Wa pa hingpit nga nag-grand opening ang maong safari apan nagsige na kini og dawat og bisita sukad niadtong Enero ning tuiga.

Matod sa Chief Operating Officer niini nga si Eduard Jarque Loop nga sa unang tulo ka buwan daghan ang locals nga nibisita apan karon nagkasaka usab ang turista nga mga Korean ug Chinese nationals.

Gikan sa 120 ka species sa mga hayop ngadto sa liboan ka mga hayop ang makita sa maong safari. Usa sa nag-unang atraksyon sa safari kining mga animal nga wala sa nasod, susama niining giraffes, white tigers, zebras, ug uban pa.

Gibutyag ni Loop sa Superbalita Cebu nga mapun-an ang white tiger sa zoo apan waa pa kini nila gipakita sa publiko kay nag-adjust pa kini sa klima lakip usab nga ilang i-introduce kining mga white lions.

Gawas sa mga hayop nga pwede makita sa safari, adunay libre nga bird show sa ala 1:45 sa hapon.

Samtang adunay ATV, zip line ug trekking ang maong safari apan lahi kini og bayad.

Anaa usab sa P170-P250 ang kantidad sa pagkaon sud sa safari, pagdala og igong kwarta alang sa grupo.

Gibutyag usab ni Loop nga adunay 20 ka cabin rooms na ang ilang gihimo alang sa gusto mag-overnight sa atraksyon.

Oktubre o Nobiyembre ron tuiga ang grand opening sa maong safari.