KARONG Semana Santa daghang mga makalingawng programa ug mga salida ang atong makita nga haum karong Semana Santa.

Ang higala natong si Dan Lopez nga nakita nato sa salida nga "Bayrus" makita nato pag-usab sa drama Lenten special nga "Kab-uton Ko Ang Langit" ug "Rayna sa Pamilya" sa CCTN Channel 47.

Karon nga "stay home" ang atong drama, pun-on ug busgon nato ang atong mga kaugalingon sa atong dakong pagtuo nunot sa epidemya nga niabot kanato.

Ang "Kab-uton Ko Ang Langit" gisuwat ug sa direksyon ni Debbie Sta Cruz. Bida dinhi silang Dan Lopez, Jolaica Amiana, kauban silang Khryz Gian Yuson, Jan Jan Lara, Khryz Kate Yuson, Aika Young, Andrew Esotto ug uban pa.

Makita ang "Kab-uton Ko Ang Langit" niining mga petsaha ug oras:

April 8, (Holy Wednesday) 3:00-4:00 pm; April 10, (Good Friday) 6:00-7:00am; April 11 (Black Saturday) 7:00-8:00am; April 12, (Easter Sunday) 4:00-5:00 pm;

Sa "Rayna sa Pamilya" bida gihapon si Dan Lopez, Maricris Monroid ug Ligaya Rabago kauban usab silang Baby Condeno, Andy Manatad, Paulus Cañete, Eli Manlangit, Shim Dagatan ug Chivas Nadela, sinulat ni Restie Jumaoas Nur ug sa direksyon ni Sam Costanilla.

Ang airing date sa "Rayna sa Pamilya" mao ang mosunod: April 8 (Holy Wednesday) 6:00am to 7:00am; April 9,2020 (Holy Thursday) 6:00am to 7:00am; April 11 (Black Saturday) 1:30pm to 2:30pm; April 12,2020 (Easter Sunday) 9:30pm to 10:30pm.

Nunot sa atong pag-ampo ug pamalandong karong Semana Santa, magpabilin ta nga naa sa balay ug amping tanan, ay'g saba!