ANG Mrs. International 2017 nga si Jessica “Jee” Candelasa – Eribal mibahin sa iyang oras sa pag-atiman sa iyang trabaho isip Human Resource manager, volunteer og charity programs, pageant coach, asawa ug inahan lakip na ang mga pagpangandam sa laing beauty pageant nga salmutan ning tuiga didto sa America.

Gipugngan una ni Jee ang pagbutyag sa maong pageant samtang naghikay pa siya sa mga dokomento nga gikinahanglan sa iyang pagbiyahe uban ang laing Cebuana nga Miss Teen Princess of the World 2018 nga si Keena Shanelle Sularte.

Sila si Eribal ug Sularte magsilbing pambato sa Pilipinas sa maon unyang beauty pageant.

Gipahibawo sa 42 anyos nga HR manager sa usa ka BPO industry nga sa iyang mga experience isip usa ka beauty title holder migahin sab siya og panahon ngadto mga batan-ong beauty aspirant.

“I do (pageant) coaching on weekends. Ganahan ko ma-impart sa ilaha kana bitawng winning spirit of a candidate,” tipik sa pamahayag ni Jee sa dihang nahinabi sa Superbalita Cebu.

Iyang gipahinumduman ang mga batan-ong kandidata nga mosalig sa kaugalingon, ipabilin ang orihinal nga estilo inay ang pagpangopya ngadto sa uban kay ang labing importante nga ilang mapakita ang ilang poise ug projection diha sa ibabaw sa stage.

“I don’t prefer memorization during Q&A. You need to answer the question by heart,” paapas ni Jee.

Tug-an ni Jee ug nganong pabilin siyang curvaceous mao ang healthy diet ug exercise. (FVQ)