ANG mga kanta bahin sa gugma ug kabataan ang nanghawod karong tuiga sa 39th Cebu Pop Music Festival nga gipahigayon niadtong Biyernes sa IC3 Pavilion sa Mabolo.

Dunay tulo ka kategorya ang kumpetisyon ug dunay upat ka finalists sa kada kategorya. Ang mga mananaug mao ang mosunod:

“Kon Pwede Lang” (Awit sa Gugma Pop/Ballad category) nga gi-composed ni Jesson Albaran ug gi-awit ni Gerlyn Ville Abano;

“Kabataan Bag-ong Katilingban” (Awit sa Pagpakabana) nga gi-composed ni Jade Castro ug gi-awit sa batang si Yessha dela Calzada, kinsa mao say nidaug nga Best Interpreter;

“Hugot Pas Huot” (Huni sa kasingkasing) nga gi-composed ni Jeff Escarda/ lyricists: Adonis Durado ug Asser Dilao ug gi-awit ni DJ Mae Dente ug Asser Dilao.

Ang tulo ka grand champion nakadawat kada usa og P100,000 cash prize. Ang non-winners tag-P20,000. Samtang ang best interpreter P10,000 cash prize.

Ang special guest performers mao ang Kapamilya stars Anna Fegi (Cebu Pop 1997 best interpreter) ug Sheena Belarmino (ang interpreter sa grand prize winning composition sa miaging tuig).

Sa ika-40 nga anibersaryo sa Cebu Pop sunod tuig, gianunsyo nga ibalik nila sa karaang format nga 12 ang magtigi sa open category ug usa na lay grand prize apan duna nay second ug third prize.

Ang Cebu Pop Music Festival nagsugod tuig 1980 nga brainchild sa kanhi kongresista niadto ug karon Talisay City mayor Eduardo Gullas nga mao say chairman sa Cebu Arts Foundation Inc., ang nagpaluyo sa maong Cebuano songwriting contest.