GISUGYOT sa unom ka mga team sa tinun-ang civil engineering sa University of San Carlos (USC) ug duha nga Dutch universities ang pipila ka mga solusyon sa pagpataas sa mga kahinguhaan sa tubig ug pag-rehabilitate sa mga nahugawang bahin sa mga sapa sa Guadalupe ug Mahiga.

Uban sa migiya nilang mga propesor, gihatag sa mga tinun-an ang ilang mga sugyot atol sa pagtapos sa River Scan Challenge (RSC) 2019 sa miaging Oktubre 22 didto sa St. Mark Hotel, dakbayan sa Sugbo.

Subay sa Climate Scan Challenge, usa ka hiniusang programa sa USC ug sa Kagamhanan sa Dakbayan sa Sugbo ang RSC uban sa Rotterdam University of Applied Sciences (RUAS) ug Hanze University sa Netherlands.

Gipasiugda sa Cebu Leads Foundation, Inc. ang siyam ka adlaw nga programa sa ikatulo na ron ka tuig uban sa pakig-alayon sa Metro Cebu Development Coordinating Board (MCDCB), mibutyag si assistant instructor Kathrina Marie M. Borgonia.

Tumong sa RSC 2019 sa pag-ila sa best management practices (BMP) sa rehabilitasyon sa suba, pagpataas sa pagkahibalo sa mga pamaagi sa pagsagubang sa pagbag-o sa klima, pag-scan sa mga sapa alang sa pagpaayo sa kalidad sa tubig, ug mga plano sa pagdumala sa baha.

Ang bag-ohay nga hugna nagsugod niadtong Oktubre 12 sa dihang gipaambit sa dakbayan ang mga kasamtangang programa nga may kalabotan sa paglimpiyo, pag-monitor ug pag-rehabilitate sa 10 ka mga sapa.

Gibutyag ni Engr. Joel M. Reston, kasamtangang nagduma sa Cebu City Planning and Development Office, nga kontaminado ang mga sapa sa Guadalupe ug Mahiga, ilabina sa ubos nga bahin, nga puno sa mga basura ug plastik.

Nasuta sa bag-ohay nga pagpanglimpyo ang pataka og paglabay sa mga hugaw nga tubig gikan sa mga baboyan, ingon man mga industriya ug lokal nga mga pamatigayon.

Gibutyag usab sa representante sa DENR nga si Cindylyn Pepito nga ang mga sapa nga gibantayan nila adunay taas nga Biological Oxygen Demand (BOD) ug fecal coliform count, gikan gihapon sa nahisgutang mga tinubdan sa hugaw. (PR)