NAKAHILAK sa kalipay si Joan Aniñon-Pacres human niya mahibaw-i nga siya nagsabak sa unang liwat nila sa iyang bana nga si Eduardo Pacres, 39.

Niadtong Oktubre 26, 2017, nakompirmar ni Joan nga siya nagsabak na base sa resulta sa pregnancy kit (PT).

“Nakahilak ko sa kalipay kay sige koy check up sa PT unya pirme lang negative. Four years ko pinaabot ani,” asoy sa 32 anyos nga ginang.

Sila si Eduardo ug Joan nakasal niadtong Mayo 8, 2014 sa parokya ni Sto. Tomas de Villanueva, Barangay Poblacion Pardo, siyudad sa Sugbo.

Alas 10:44 sa gabii niadtong June 3, 2018 dihang natawo ang bata nga gipanganlan nila og Jiana Eduardine Pacres pinaagi sa normal delivery.

Si Jiana nahimugso sa Cebu Puericulture Center & Maternity House, Inc, siyudad sa Sugbo human sa lima ka oras nga pagbati ni Joan.

Kini nitimbang og 2.8 ka kilos kun 6.17 ka libras.

Nahingpit ang pagka inahan ug amahan sa duha pinaagi sa ilang unang liwat nga ilang gihulagway nga tubag sa ilang pag-ampo.

“Paggawas na niya diha ko nakahilak...Pagkadungog nako sa iyang hilak nakampante ko,” sugilon ni Joan.

Kagahapon, gibunyagan si Jiana pinaagi sa seremonyas nga gihimo ni Padre Erwin Pilario sa samang parokya.

Di mominos sa 30 ka mga maestra, maestro ug principal sa Mambaling Night High School ang gikuha nga mga ninong ug mga ninang sa bata.

Sila si Eduardo ug Joan sa maong tunghaan usab nagtudlo.

Gipakugos usab ang suod nga mga higala sa magtiayon nga sila si Leonides Gabayan, Sheila Gravinez, Charlindhil Amamag ug Roel Bariquit.

Sumala ni Joan nga memorable ang petsa nga June 3, kay gawas nga birthday kini sa ilang unang anak, mao usab kini ang petsa dihang dungan sila nga nahimong regular ug permanente nga mga magtutudlo ni Eduardo sa publikong tunghaan niadtong 2013. (SCG)