REYALIDAD. Honest. Self-Love.

Mao ni akong mahulagway sa bag-ong salida nila ni Kathryn Bernardo ug Alden Richards nga “Hello, Love, Goodbye.”

Wala ko kasabot kung sikat lang gyud kaayo ang duha o daghan ang excited sa ilang labing una nga team-up tungod kay sa unang adlaw nga gipasalida kini sa mga sinehan, puno kini.

Nakurat ko!

Ug tuod man, wala ko gipakyas sa duha, maayo ning istorya ni Carmi Raymundo ug ang direksyon ni Cathy Garcia-Molina.

Goodbye KathNiel na ba ni? Well, base sa akong nakita, aduna’y chemistry ang duha.

Ang “Hello, Love, Goodbye” nagtuyok kini sa kinabuhi ni Joy Fabregas (Kathryn) ug ni Ethan del Rosario (Alden) isip mga Pinoy nga anaa nagbase sa Hong Kong.

Reyalidad

Makaingon ko nga reyalidad ang istorya sa maong salida tungod kay gipakita niini ang kamatuoran sa mga overseas Filipino workers (OFW) diin andam niini buhaton tanan alang sa pamilya sa Pilipinas.

Bisan og lisod na kaayo apan maninguha tungod lage kay naa sa gawas sa nasod. Bisag mingaw sa pamilya, kinahanglan nga moatubang sa kamatuoran nga nagtuyok ang kultura sa Pilipino sa gitawag nga utang kabubut-on.

Honest

Honest tungod kay ang role ni Kathryn nga si Joy nagpakamatinud-anon lang sa iyang kaugalingon.

Bisan pa man nga aduna siya’y responsibilidad sa iyang pamilya apan aduna usab siya’y iyahang kaugalingon nga damgo nga gusto niyang makab-ot.

Pareho usab kini kang Ethan, kinsa tungod kay naboang sa gugma, nabiyaan ang responsibilidad sa pamilya apan nibalik ug nibawi sa iyahang amahan ug mga igsuon.

Nalipay ko nga naghuna-huna nga nagkadaghan na ang salid sa Philippine Movie Industry nga naghasmag sa tinuoray nga nahitabo sa kinabuhi, dili kanang gi-”exag” ang storya.

Self-love

Matod pa ni Joy sa salida nga “Pwede magpaka- selfish?” Dili siguro tanan ang motug-an niini apan daghan ang gusto nga makab-ot ang ilahang kaugalingon nga damgo.

Bisan pa man nga nahigugma siya ni Ethan, apan mas gihigugma niya iyang kaugalingon ug mas gipili niya ang molarga sa Canada aron matinuod kini.

Dili kahibudngan nga positibo ang reviews niini.

Dili happy ending apan nahitabo kini sa tinuod nga kinabuhi.

Mao diay’ng “Hello, Love, Goodbye” kay mobiya ra gyud diay siya. Murag ikaw ba, gibiyaan pud.