SA ikaduhang edition sa Super Suroy diin atong gipakita ang mga dapit o suroyanan nga nagusbat human na agi-an sa Bagyong Odette.

Atong lili-on ang kahimtang sa Plaza Rizal nga nahimutang sa kinapusoran nga bahin sa Dakbayan sa Lapu-Lapu.

Human nga gibuksan pagbalik ngadto sa publiko niadtong buwan sa Hunyo, 2021 ang bag-ong gi-renovate nga Plaza Rizal way pagkahubas ang mga tawo nga mosuroy sa maong lugar.

Gani, gipatuman ang per batch sa pagpasulod sa mga tawo aron kalikayan ang pagdasok sa maong lugar.

Ang Plaza Rizal nahimutang, kilid sa simbahan sa Birhen sa Regla sa Barangay Poblacion ug sa atubangan niini mao ang City Auditorium.

Ang maong dapit gi-ila nga moderno nga recreational hub ug nahimong sentro sa plaza ang musical fountain nga maoy atngan sa mga manuroy sa higayon nga mosuway ang water fountain nga i-timing sa musika.

Ideal sab kini nga suroyanan sa mga senior citizens gawas sa mga batan-on ug usa ka PWD-friendly ang plaza.

Apan sa dihang miigo ang Bagyong Odette niadtong Disyembre 16 giguba sa maong katalagman ang mga dagkong punoan sa kahoy nga naglibot sa plaza ug ang gipasug-an nga Christmas tree ang nabali.