DEAR Papa Joe,

Tawga lang ko sa ngalan nga Dolly, hingkod. Magpahandos bira lang ko sa akong problema.

Akong ex sa una, Papa Joe, naa mi anak. Karon ang naproblema ko kay wala siya mosustinto sa bata. Unya iya pang i-deny nga iya ning anak nga 100% sure man ko nga siya ang papa sa bata. Ug kahibawo siya ana, Paps.

Unya iya pa kong giingnan nga pangitaon kuno mi niya para kuhaon niya ang among anak. Karon, mag 2 years old na ang among anak pero wala siyay gikahatag sa bata bisan piso. Karon akong pangutana, Paps, makuha ba niya ang bata diri nako bisan wala pa siya magsustento ug di pud mi kasado?

DOLLY

Dolly,

Sa akong nasayran sa balaod sa new Family Code kay di na niya makuha ang bata kay di mo kasado. So, illegitimate ang bata bisan pa gani magdala sa iyang apelyedo. Ang bata, kon di nimo kaya sa pag-atiman, immediate family na padong. Meaning, kadugo nimo o ang imong family ang mohupot, gawas lang og gusto ka ihatag gyud ang bata didto para sa iyang kaugmaon kon tan-aw nimo maayo pagkabutang ang amahan.

Kabahin sa sustento nga wa siya mohatag, naa nay balaod niana nga makapangayo ka og suporta niya. Duol lang sa Department of Social Welfare and Development (DSWD) para sa mga kinahanglan nimo buhaton.

Mao gyud na ang resulta lagi sa dinalian nga relasyon, kanang wa gyuy plano ba basta kay nahigugma mo ron unya na ugma, unya ang resulta ang bata ang maangin. Pero kon kaya nimo buhion ang imong anak, ayaw na to hasula. Total maningil ra unya iyang mga binuhatan puhon.

PAPA JOE

(sa inyong tampo ipadala lang sa papajoesuperb@gmail.com)