Dear Noy Kulas,

Ako si Ramon, 36 years old. Magpatambag ko nimo bahin sa girlfriend. Sa akong edad di pa ko minyo ug kaduha pa ko nakasuway og minyo. Bagkaila mi ani niya kay ang iyang inahan nga buwag sab sa iyang papa amiga sa akong cousin.

Tawgon lang nato siya og Trix, 18 years old pero wa pa makaeskwela og college kay ikagasto kay nagkabuwag ang parents. Moagi pa kuno siya og senior high. Ni promise ko niya nga ako siyang tabangan. Karon nagkasuod mi niya hangtod naa koy na-feel something special. Na inlove na ko niya, Noy.

Nanguyab ko niya ug iya kong gisugot ug duna gyud nahitabo namo. Siya ang akong first ug ako pud ang first niya. Maayo kaha ni akong gibuhat? Tinuod naluoy ko niya pero, love nako siya. Love kuno ko niya bisan taas kaayo og gap among edad. Di ba lain paminawon nga maora ko og ni take advantage niya? Unsa man ang akong sakto ug angay buhaton?

RAMON

Mon,

Di lain paminawon kon nagkahigugmaay mong tinuod bisan sa inyong age gap kay puro mo single. Ang lain diha kay maora ka og ni take advantage sa iyaha kay nakig sex ka na niya bisan uyab pa mo. Stop it. Mahimo ra nga magkauyab mo nga di na kinahanglan buhaton pa nang butanga. Kay kon momabdos siya, patay ang tanang plano mo alang niya. Maapektuhan ang iyang ugma kay di baya lalim magmabdos ug manganak. Gikinahanglan nga bantayan ang bata ug atimanon. Instead mahiadto kaniya ang kwarta alang sa pag-eskwela, mahiadto na sa mamahimo ninyong anak.

Ikaduha, ang maayo mong tumong alang kaniya mamahimong ngil-ad kay sa ako nang giingon, maora kag nag take advantage kaniya. Maora kag nagpanindot sa iyang huna-huna og tan-aw ug gikubit nimo siya sa imong pasalig aron sugton ug higugmaon ka. I know nga kinasingkasing ang imoha, apan once mahitabo nga momabdos siya, mausab ang pagtan-aw sa mga tawo sa imong gibuhat. Maora kag nitabang na hinuon og duot ngadto sa kadaut.

NOY KULAS

Alang sa imong problema, e-mail sa kulassuper@sunstar.com.ph ug rojval69@yahoo.com