DEAR, Noy Kulas

Maayong adlaw. Tawga lang ko og Jing, 32 years old while ang akong uyab o maingon tang live in partner 55. Daghan ang nahibung nganong naa ko aning tawhana nga sa kadaghan sa mga pareho og edad nako unya naa ko niya.

Ingon ani ang nahitabo. Wa ko makaeskwela og college kay way ika afford ang akong parents. Nitrabaho na lang ko og department store diin didto mi nagkita. Nagkaila, nagkasuod ug nanguyab siya nako. Primero wa koy love niya kay dako lagi og gap ang among edad, apan kadugayan ganahan na ko niya. Hangtod ni-offer siya nga paeskwelahon ko ug gusto lagi kong makahuman, nisugot ko but in return, mag live in.

Tinuod nakahuman ko sa akong pag-eskwela tungod niya. Maayo ra man unta to siya, pero karon nga nakatrabaho na ko, nigawas ang iyang batasan, seloso na kaayo ug manapat na kon maglalis mi. Nagkagrabe na siya unya kusog pa kaayong mangwenta sa iyang natabang diri nako. Ang akong pamilya ug friends nagsige na og ingon nga biyaan. Wa na kaayo ko mag love niya but maluoy ko maghuna-huna tungod kay naninguha siya og maayo nga makahuman ko sa college. Kon unsa ko karon, dako siya og na-contribute. Noy, unsay imong huna-huna sa akong situation.

JING

Jing,

Kon magsige na lang mo og away, tinuod di na maayo labina sa inyong pagpuyo. Basin ganahan na siyang mo settle down mo kay nag live in ra man kaha mo karon. Pangutan-a siya unsay inyong direksyon sa inyong relasyon. Naa ba siyay plano nga magminyo mo kay dugay na mong nagpuyo. Basin tingali na insecure siya karon tungod kay bisan nagpuyo mo, anytime mahimo man nga imo siyang biyaan kay di mo kasado.

Apan sa di mo pa kini himuon, maayong mag-estorya mo kabahin anang iyang anger management nga resulta sa iyang kaseloso nga way basehanan. Ipakita ug ipabati kaniya ang assurance nga imo siyang gimahal. Basin sa imong ka busy, wa na moy time nga mag bonding o basin ikauwaw mo siya kay sama ra nimo siya og papa kon manuroy mong duha.

Unsa gani ang padulngan sa inyong panag-estorya ug dagan sa relasyon, dawata kini. Ang importante nga nagklarohay mo aron ma settle ang unsa man nga mga isyu. Ayaw ninyo likayi ang pag-discuss sa tunukong mga aspeto sa inyong relasyon.

NOY KULAS