NAGHUNAHUNA ko. Wa ko kadesisyon dayon kon mosugot ba ko sa gihangyo ni Rodrigo nako.

“Please, Amel. Importante lang gyud kaayo.”

Wa gyud ko masayop sa akong pagtuo nga importante ang tuyo ni Rodrigo nako. Miginhawa kog sagunson.

“Sige, Rod. Asa man?”

Sa usa ka fast food sa uptown mi nagkita si Rodrigo. Diha na siya sa sulod sa kan-anan sa akong pag-abot.

“Dinhi ka lang una, Amel, kay mag-order ko para sa atong snack.”

Naghilom lang ko nga milingkod sa atbang sa gilingkoran ni Rodrigo. Gisundan ko siya sa pagtan-aw nga mipaingon sa counter. Unya wa madugay nahibalik siya ug gipatong niya ang hamburger ug juice sa ibabaw sa lamesa nga among nahimutangan. Miinom kog gamay sa pineapple juice ug miingkib sa hamburger.

Mitan-aw ko kang Rodruigo nga mitan-aw pag-ayo nako. Di ko komportable sa iyang tinan-awan nako.

“Please, Rod, don’t look at me like that.”

“Duna koy itug-an nimo, Amel. It’s about time nga makahibawo ka.”

“Unsa man kana, Rod?”

Na, gikulbaan kaayo ko. Nagtuo ko nga pangulitawhan na ko ni Rodrigo,

nga iya na kong tug-anan nga love ko niya.

“Bayot ko, Amel.”

Hapit nako mabuhi ang gikupotan kong baso sa juice. Kinsa man say di makuratan sa confession ni Rodrigo nga tinuod man gyud siyang lalaki nga tan-aw.

“Unsa?”

“That’s true, Amel. Nakahibawo sila si Mama ug Papa kon unsa ko. Gusto nila nga makauyab kog girl kay basin kuno kon mahimo kong tinuod nga laki. But di gyud, Amel. Girl gyud ang akong heart. Duna na gani koy uyab nga laki.”

Kahilakon si Rodrigo. Nakapanglingo na lang ko. Giduol ko siya ug akong gigakos. Mibakho siya sa akong dughan. Gihapuhap ko ang iyang buku-buko. Ug dihang wa na siya maghilak, mibalik kog lingkod sa iyang atubangan.

“So, gidawat na gyud nimo kon unsa ka, Rod?”

Miginhawa ko pag-ayo. Morag dunay mga tunok nga naibot sa akong dughan.

Mitando si Rodrigo.

“Ikaw nay bahalang mosulti sa imong parents bahin nako, Amel.”

Mitando ko. (Sumpayan)