USA ka 38-anyos nga lalake namatay diha-diha human pusila sa unang adlaw sa pagpatuman sa general community quarantine sa Sugbo sa Lunes, Hunyo 1, 2020.

Ang biktimang giila nga si Bernardo Ramirez, 38, traysikol driver, naglingkod lang daplin sa karsada sa Sityo Taytayan, Barangay Buhisan, Dakbayan sa Sugbo Lunes sa hapon.

Si Police Staff Sergeant John Eric Samosa sa Labangon Police Station nga nahinabi sa Superbalita Cebu, niingon nga si Ramirez nag-estambay lang gawas sa balay sa iyang ig-agaw samtang naglingkod sa bangku.

Giingong kalit lang nga gihunongan sa usa ka motorsiklo, kinsang drayber nipusil kang Ramirez.

Duna pay laing motorsiklo ang nagsunod sa gunman, kinsa gituohan nga kauban.

Daling nanibat ang duha.

Si Ramirez nakaangkon og samad pinusilan sa ulo ug patay nang naabtan sa medical personnel sa siyudad.

Si Dave Lipisen, ig-agaw ni Ramirez, niingon nga wa siyay nasayran nga may kaaway ang biktima. (BBT)