Ang mga tinun-an ug mga magtutudlo sa Cogon Pardo Barangay Alternative Learning System (ALS) Community Learning Center nipahigayon og kalihukan sa komunidad pinaagi sa mangrove planting.
Nananom og mga bakhaw o mangrove ang mga estudyante sa ALS sa Sitio All Season 3-Back Central sa Barangay Cogon Pardo, dakbayan sa Sugbo niadtong Marso 18, 2024.
Tumong sa maong aktibidad mao ang pagpalambo sa ecosystem sama sa paghatag og dugang oxygen gikan sa mga tanom para sa mas maayong kalidad sa hangin.
Usa usab kini sa pagpaminos sa mga epekto sa climate change, lakip sa paghatag og luwas nga breeding ground sa mga isda sa kabakhawan.
Ang mga bakhaw manalipod sa kabaybayunan labina kon panahon sa bagyo diin dunay dagkong mga balod nga masagang niini.
Samang pamaagi, gitudloan ang mga estudyante sa ALS sa pag-amoma ug pagsabot sa kabililhon ug importansya sa pagpanalipod ug pagpausbaw sa natural nga kahinguhaan pinaagi sa pagtanom og mga punoan sa bakhaw sa daplin sa baybayon.
Importante nga ang mga kabatan-onan maedukar sa pagpanalipod ug pagpalambo sa bahandi sa kinaiyahan alang sa mosunod nga henerasyon.
Kini nga kalihukan giorganisar sa mga magtutudlo sa ALS nga sila si Aldrin Joseph R. Loresto, Dennis A. Baysa, Lloyd B. Englis, Melchor I. Billacasten, ug Dr. Jerlyn G. Palata.
Ang barangay council sa Cogon Pardo nga gipangulohan ni Barangay Captain Harry Eran, Cogon Pardo Sangguniang Kabataan Council nga gipangulohan ni Dan Deither Eran, ug Pardo District Community Rover Scout, ningsalmot usab sa maong kalihukan. / PR