Usa ka drayber gidakop tungod sa reklamo ngadto sa kapulisan sa iyang kanhi kapuyo nga ‘ni-kidnap’ sa iyang anak nga 4 anyos nga batang lalaki human siya nidumili sa pagpakig-uli niini.

Sumala sa saksi, ang pagkuha sa bata nahitabo sa alas 11 sa buntag sa Martes, Nobiyembre 14, 2023, sa Sitio Alang-Alang, Brgy. Buanoy, lungsod sa Balamban.

Si Police Lt. Col. Joey Bicoy, hepe sa Balamban Police Station nga nahinabi sa Superbalita Cebu, niingon nga alas 4:45 sa hapon sa Martes, ni-report sa ilang buhatan ang inahan nga si Crystal Carmelotes, 22, nagtrabaho sa usa ka kompaniya, taga Alang-Alang, Buanoy.

Nangayo kini og tabang bahin sa gibuhat sa iyang kanhi kapuyo nga si Dorie Enriquez Rosauro Jr., 22, taga Misamis Occidental, apan nagpuyo sa Brgy. Arpili, Balamban.

Usa ka silingan nibutyag nga ang bata gidala sa suspek sakay sa bus padung sa south sa probinsiya.

Tungod sa impormasyon, dali silang nakig-alayon sa Oslob Police Station ingon man sa shipping company sa wharf sa lungsod.

Alas 4:30 sa hapon sa naasoy nga adlaw, nihatag og feedback ang Oslob police nga nakit-an sa shipping company ang suspek nga uban sa bata nga molukat unta og ticket hinungdan nga nasikop.