PRODUKTO sa rapid mass testing ang pagkatkat sa gidaghanon sa nasakit sa Covid-19 sa siyudad sa Sugbo, ilabina sa nagdasok nga kabalayan ug naghuot nga prisohan. Lakip sa rapid test ang kapolisan ug health workers isip frontliners nga bantang sa inpeksyon. Ang siyudad maoy epicenter sa Central Visayas, ilabina sa pagsaka sa Covid-19 sa Luz, Labangon, Mambaling, Carreta, Suba ug Tejero. Nagkapuliki sa pagpanagang. Ang positibo nga asymptomatic o walay gipamati gipahiluna sa 33 ka barangay isolation centers. Mild o moderate adto sa quarantine facilities sa Block 27 Reclamation, Sacred Heart School-Ateneo de Cebu, IEC Convention Center-Mabolo ug sa gitanyag sa shipping lines, private hospitals ug hotels. Nagtukod og dugang quarantine facility sa south road properties. Serious o severe dalhon sa tambalanan. Positibo sa city jail gilain sa isolation building.

Hugot nga gipatuman ang preventive measures, protocols ug guidelines. Number coding sa mga sakyanan. Letter coding sa mangompra. Gipadagan nga mobile market. Pasil Fish Market temporaryong gibalhin sa SRP. Limitado ang makagawas pagpamalit og pagkaon, tambal, ubang panginahanglan. Motubag sa mga yangongo ug reklamo ang Crisis Committee sa Command Center nga dunay 10 ka ambulansya, 40 ka buses ug 20 ka sakyanan sa frontliners. Migahin og P100M nga ayuda sa barangays nga P1M, P2M, P3M agad sa populasyon;P 40M sa gi-order nga 50,000 rapid test kits sa tag 800 pesos ang usa. Lakip nga natabangan ang na-stranded. Nanghatag bugas ug foodpacks apan mitumaw ang kaguliyang kay misalga ang Mayor’s Information Liason Office (MILO) inay adto ang kaakohan sa kapitan. Hinuon kasagaran nahatagan, pipila lamang ang wala makadawat. Mao say nahitabo sa amelioration.

Sa kalit nga krisis, nalangay ang financial assistance sa 82,000 ka senior citizens. Hinuon, ang dawatunon sa Marso, Abril ug Mayo gihiusa sa paghatod sa panimalay. Ang natanggong sa probinsya makakobra sa city hall inig kahilom sa Covid-19. Isunod ang pagtunol sa 12,000 ka mga PWD.

Naleksyon ang kagamhanan ni Mayor Edgar Labella sa wa damhang pag-abot sa Covid-19. Nakita ang kamahinungdanon sa housing projects para informal settlers, nagpuyo sa danger zones ug sa naghuot nga lugar. Mapuslanon ang pamunuan nga mahigalaon sa mga negosyanti nga miabag sa krisis ug epiktibong koleksyon sa buhis nga magamit gilayon panahon nga mohasmag ang katalagman. Hinuon, buhong ang panudlanan isip sentro sa patigayon, industriya ug uyok sa edukasyon. (csa_1156@yahoo.com/0906-464-8954)