Sa pasiaw pa, kon ang usa ka lalake daghan og asawa, ang tawag niini polygamy. Kon duha ang iyang asawa, bigamy. Pero kon usa ray asawa, monotony. Unsay silot sa bigamy? Duha ka mother-in-law.

Ubos sa Article 349, Revised Penal Code of the Philippines, ang usa ka tawo manubag sa krimen nga bigamy kon (1) siya “legally married,” (2) ang maong kaminyuon wa pa maanular ug kon ang iyang kapikas “absent,” di pa “presumed dead” subay sa Civil Code, (3) nisud siya sa ikaduhang kaminyuon ug (4) gituman ang essential requisites sa usa ka balidong kaminyuon.

Ang rikisito sa balidong kaminyuon ubos sa Article 53, Family Code of the Philippines, naglakip sa (1) legal capacity sa contracting parties kon saktog edad nga labing menos 18 anyos, (2) gawasnon ug kaugalingong kabubut-on, (3) authority sa nagkasal ug (4) dunay marriage license, gawas lang sa marriage of exceptional character.

Sagad nga depensa sa kasong bigamy mao nga di balido ang unang kaminyuon o ang ikaduhang kaminyuon. Sama ni Luisito Pulido nga giabsuwelto sa Korte Suprema en banc sa kasong bigamy (Pulido v. People, G.R. No. 220149, July 27, 2021) sa desisyon nga gisuwat ni Associate Justice Ramon Paul Hernando.

Si Pulido 16-anyos sa dihang gikasal siya ngadto sa iyang hingkod nag panuigon nga maestra nga si Nora Arcon niadtong Septyembre 5, 1983. Niadtong Hulyo 31, 1995, gikasal siya sa ikaduhang higayon kang Rowena Baleda.

Gipasakaan siya sa kasong bigamy. Gikonbikto siya sa Las Piñas City Regional Trial Court (RTC) Branch 275 ug gisilotan sa minimum nga duha ka tuig upat ka buwan ug usa ka adlaw ug maximum nga walo ka tuig ug usa ka adlaw sa bilanggoan. Ang Court of Appeals midason sa desisyon sa RTC sa hukom niini sa Marso 17, 2015.

Gi-reverse ang maong desisyon sa Korte Suprema kay ang unang kaminyuon ni Pulido ngadto kang Arcon kuwang og marriage license. Ang registrar nideklarar nga way “record of entry” sa petsa sa pagluwat ingon man numero sa marriage license sa ilang mga libro. Sa laktod, di balido ang unang kaminyuon kay way marriage license.

Ang kaminyuon ni Pulido kang Arcon gideklarar nga nulo sa RTC Branch 22 sa Imus City, Cavite, sa Mayo 11, 2016. (edbarrita@gmail.com)