USA sa mga estorya ni anhing senador Juan Flavier sa iyang lindog nga “Barrio Breeze” mao kadtong bahin sa ulitawo didto sa Bicol nga gibiyaan sa uyab ug nakahukom nga magpakamatay pinaagi sa pagpaligis sa tren.

Busa nihigda siya sa riles sa tren. Namatay gyud ang maong tawo, apan di tungod kay naligsan sa tren. Namatay siya sa kagutom ug kauhaw sa pagpinaabot sa tren. Tinuod nga dunay riles, pero way tren sa Bicol.

Niadto pang miaging tuig gihisgotan nga magtukod og bag-ong railway system gikan sa Manila paingon sa Bicol ginamit ang P175 bilyunes nga overseas development aid nga utangon gikan sa China.

Usa ka consortium sa lokal ug langyaw nga mga kompaniya niluwat og pamahayag nga magtukod sila og usa ka light rail transit (LRT) dinhi sa Metro Cebu ubos sa gitawag nga design-finance-build-transfer and manage system.

Di makagasto og bisan usa ka dako ang gobyerno niining maong proyekto nga gastohan sa One Belt, One Road program sa gobyerno sa China. Ang gobyerno sa China aktibo karon sa pagbanhaw sa gitawag nga Silk Road kaniadto.

Lakip sa maong consortium mao ang mga kompaniya gikan sa China nga mao ang Guangzhou Metro China, Guangzhou Metro and Design Institute China, Anhui Shenyun Environmental Protection Group Co. (China), Guangdong Hydropower Co. Ltd. (China), Harvest Global Investment Pte Ltd. (Singapore) ug Sinophile Sheng Yun Management Inc. (Philippines).

Pagatawgon ang maong proyekto nga Metro Cebu Light Rail Transit (Cebu LRT). Ang LRT system mokonektar sa mga syudad sa Carcar ug Danao pinaagi sa overhead LRT subay sa highway.

Apan inig abot sa syudad sa Sugbo, motidlom kini sa ilawom agi sa usa ka subway system. Ning maong paagi, di kini makahasol sa publiko kay ang construction adto man sa ilawom sa yuta. Duna pay linya mga motabok gikan sa Sugbo paingon sa Mactan pinaagi sa usa ka taytayan.

Ang pangutana mao nga madayon ba kini, ug kon madayon man, kanus-a pa kaha. Sa usa ka press release, ang consortium niingon nga sugdan na kini sa sunod tuig. Maayo kon madayon. Kay kon di, kadtong gustong magpaligis sa tren delikadong mamatay sa gutom ug uhaw sa pagpinaabot sa tren.