Gianunsyo ni Interior and Local Government Secretary Eduardo Año niadtong Lunes sa gabii, Nobiyembre 30, 2020, nga mahimo na nga makasulod ang mga menor de edad sa mga malls basta kuyogan sila sa ilang mga ginikanan.

Giawhag usab ni Año ang mga lokal nga kagamhanan sa pagpasar og ordinansa nga magpaluyo sa maong direktiba. Nunot kini, matod niya, sa inanay nga pagpalapad sa age group nga mahimong makagawas sa panahon sa Pasko bisan sa Covid-19 pandemic.

Sa pagsugod sa pagpatuman sa lockdown niadtong Marso, gidid-an ang mga menor de edad ubos sa 21 anyos ug mga senior citizens nga labaw sa 65 anyos sa paggawas sa ilang mga balay. Gilugakan kini ug karon mahimo na silang makaadto sa mga lugar sa turismo.

Apan gisupak ni Health Secretary Francisco Duque III niadtong Miyerkules nga tugotan ang mga menor de edad sa pag-adto sa mga malls uban sa ilang mga ginikanan kay ang mga minors dili exempted sa Covid-19 infection ug, gani, mahimong superspreader sa coronavirus.

Sa usa ka online media forum, si Duque niingon nga tres ngadto sa singko porsento sa tanang mga kaso sa Covid-19 sa Pilipinas naglambigit og mga batan-on. Mao kini ang hinungdan nga supak ang Department of Health nga pagawson sila sa balay kutob sa mahimo tungod sa risgo, matod niya.

Si Duque niingon nga bisan ang kabataan di magpakita og severe symptoms, mahimo sila nga maoy mopakatap sa coronavirus, pinaagi sa pagsulti ug paggakos sa ilang mga paryente. Kuyaw nga mosaka ang infection rate kon pagawason sila.

Kinsa man kaha ang mopatigbabaw ning panagsumpaki sa mga pangulo sa duha ka mga dagkong departamento sa gobyerno bahin sa pagtugot sa mga menor de edad nga makasud sa mga malls kuyog sa ilang mga ginikanan?

Ang mga negosyante naghinam-hinam na nga managhan ang mga tawo nga makagawas sa ilang mga panimalay. Mas daghan ang mga tawo nga moadto sa ilang mga tindahan, mas dako ang posibilidad sa mosaka ang ilang halin.

Apan matod pa ni Cebu Chamber of Commerce and Industry president Felix Taguiam, mas maayo tingali nga ang mga dagkong opisyales ang mohukom unsay maayo kay ang Covid-19 usa ka bug-at nga isyu sa panglawas. Mosunod lang sila kon unsay desisyon.