GISUPAK sa mga motorcycle clubs ug sa libo ka libong nagmaneho og mga motorsiklo ang Republic Act 11235, ang Motorcycle Crime Prevention Act. Gitumong ang maong balaod sa paglikay nga gamiton ang motorsiklo sa paghimog mga krimen.

Usa sa gibasol sa daghang wa masulbad nga mga kaso sa pagpatay mao ang mga mamumuno nga nag-riding-in-tandem. Busa nagpahamtang ang maong balaod og silot nga pagkabilanggo ug bug-at nga multa niadtong makalapas niini.

Nagmando usab ang maong balaod sa pagbutang og color-coded ug mas dagko nga plate number sa atubangan ug luyo sa mga motorsiklo. Apan daghang nisupak sa pagbutang og plate number sa atubangan sa motorsiklo.

Agi og tubag niini, si Presidente Rodrigo Duterte namahayag niadtong Sabado sa ika-25 nga National Federation of the Motorcycle Clubs of the Philippines Annual National Convention didto sa Iloilo City nga iyang isuspenso ang bag-ong balaod.

Ang pangulo, nga usa usab ka motorcycle enthusiast, niingon nga makigsulti siya ni Senador Richard Gordon, ang nangamahan sa maong balaod, nga sa tanang mga nasod way motorsiklo nga duha ang plaka, usa ra sa likod niini.

Matod pa niya delikado ang pagbutang og bisan unsang gadget sa atubangan sa motorsiklo, labi pa niadtong hait ang mga kilid, kay mahimo kining matangtang, ilupad sa hangin ug motusok sa helmet sa nagmaneho sa motorsiklo o nagsakay niini. Dako ra usab alang kaniya ang multa nga P50,000 nga angay pakubsan ngadto sa P10,000 o P15,000.

Bahin sa pagsuspenso sa balaod, si Gordon niingon nga ang usa ka balaod, mahimong amendahan apan di mahimong masuspenso. Napirmahan na ang maong balaod sa pangulo busa di na kini masuspenso apan mahimong maamendahan, matod pa ni Gordon.

Si Presidential Spokesperson Salvador Panelo niingon nga ang reklamo sa motorcycle riders mahitungod sa mas dako ug color-coded nga motorcycle license plates mahimong matubag pinaagi sa Implementing Rules and Regulations (IRR) of the Motorcycle Crime Prevention Act.

Gitahasan ang Land Transportation Office (LTO) sa pag-draft sa maong IRR. Di pa mapatuman ang maong balaod kon wa pay IRR. Apan kon di kini matubag sa IRR, si Panelo niingon nga ang pangulo mahimong motawag sa Kongreso alang sa dinalian nga pag-amendar sa maong balaod.

“If it is dangerous, then he will ask Congress to amend it. Because why should you be pursuing a law which you feel to be something dangerous when it is implemented? You will ask Congress to amend it immediately,” matod pa ni Panelo. (edbarrita@gmail.com)