WAY makatag-an kon anus-a kita pabalikon sa kiliran sa makagagahom nga nagbuhat nato maong angay kitang manlibasog nga magmalipayon kada adlaw hangtod sa atong katiguwagon.

Tungod kay di man nato madala sa lubnganan ang mga bahandi, sapi o kabtanagan, di sab maayong masubrahan ang kainot o kuripot.

Ang sapi angay gastuhon sa mga butang nga makapalipay o maka-enjoy nimo samtang buhi ug makalakaw pa.

Ayaw kahingawa kon unsay mahitabo o dangatan sa atong mga minahal kon kita mawala na o mobalik sa pagkaabo kay kon kini mahitabo, wa naman tay bation nga mga pagdayeg o panaway. Unya ang panahon nga abunda kita sa mga tawhanong kalipay mahuman na sab.

Ayaw palabi og kabalaka kon unsay mahitabo sa ugma sa imong mga anak kay kini sila duna man say ilang kaugalingong padulngan o destinasyon. Hinuon dubliha imong paghigugma, pag-atiman, paghatag og mga gasa nga makapalipay nila apan hinumdumi sa pagbilin o pahat og gamay para sab ipalit nimo og gasa sa imong kaugalingon.

Kon motungtong na gali ang edad og singkwenta pataas, kalma na sab sa pagpanrabaho aron masugdan na sab nimo ang mga tulumanon nga makalingaw sa kaugalingon. Undangi na ang pataypatay nga pagpanrabaho kay basig mao na sab hinuon ni makaingon sa sakit.

Health is wealth busa ayaw ibaylo imong maayong panlawas sa bahandi o kwarta. Ayaw og patya imong kaugalingon sa pagpanrabaho.

Huna-hunaa baya nga bisag unsa pa ka dako sa imong humayan, pila ra ka tasa ini imong mahurot sa usa ka adlaw. Bisag unsa sab ka dako sa imong pinuy-anan , 8 metro kwadrado ra imong gikinahanglan para sa imong katapusang pahuwayan.

Ang importante nga duna kay igong pagkaon, sapi nga magamit sa inadlaw-adlaw nga gastuhan ug gustong paliton, o lugar nga suroyan.

Ang maayong mood, insaktong ehersisyo, pagkaon ug masustansiyang pagkaon, inum og daghang tubig og bitamina, insaktong pahuway dako og matabang pagpataas sa kinabuhi aron imo pang ma enjoy ang nahabiling panahon dinhi sa yuta.