SUBRA 10 na ka tuig nga nag-ipon si Dennis ug Euly (tinuod ngalan gitago) apan wa gihapon sila makadisisyon nga pagpakasal. Ilang tubag, maynang way kasal-kasal kay way gasto sa annulment kon ugaling di magkasinabot unya dali ra sab magbuwag kay wa may kabilinggan.

Dili ang seremonyas sa kasal o papel nga lisensiya sa kaminyuon ang basihan aron mapalig-on ang panagpuyo kundi ang batasan sa matag partner sa ilang panag-ipon.

Dunay uban nga murag gituyo og pares sa langit kay linong ug hamugaway ang panagpuyo apan duna say uban nga mura’g iring ug iro nga kanunay magpunay og away.

Unsa may timailhan kon ang relasyon nag-tinga na?

Matod ni Kimberly Hershenson, LMSW ug usa ka therapist nga espisyalista mahitungod sa relasyon, kining mosunod maoy mga red flags kon ang relasyon kahimatyon na:

Kanunay mag-away. Non-stop ang panagbangi bisag sa gagmay nga butang. Natural sa managtiayon ang pag-lalis ug paglangtugi, apan kon segi-segi na gali unya paingon na sa pagdautay sa usag-usa ma pulong o buhat, kini maoy senyales nga makapabuwag.

Daginuton bisag way kwenta ang gilalisan unya sakit pa gyod manulti o manaway. Ang uban mopaingon sa pisikal nga pagpanapat o kulata. Kon kini mahitabo, dangop gilayon sa awtoridad.

Sunod ang ka kuwang sa kompiyansa ug pagsalig sa usag usa sama pananglit kon ang partner dunay laing gi-bathala nga gikalingawan o ba kaha dunay gitago nga sekrito o bakak (ma kwarta o butang) nga dapat unta mahibaw-an sa kapikas.

Kakuwang sa pagtagad o pag-amuma sa usag-usa. Bisag simpli nga halok, gunit sa kamot o agbay nga maka-palukso sa kalipay di lang pisikal nga gasa, rosas o tsokolate. Kon nabugnaw na ang pagtratar sa matag usa unya murag inigsoon na lang ang tinagdan, kini pasabot nga ang kainit sa gugma paingon na mapalong.

Katapusan kining ka kuwang sa intimasiya sama sa pagkatulog sa laing lawak o wa nay gana pakighilawas nga makapa-init sa pagbati sa usa-usa labi na kon maglain na og katulganan.