Good news sa tanang taga Region 7, matod ni Victor Emmanuel Caindec, direktor sa Land Transportation Office (LTO) 7, niadtong Huwebes sa gabii, Nobiyembre 26, sa pagwagtang sa mandatory drug test sa pag-renew o pagkuha og lisensiya sa pagmaneho og sakyanan.

Si Caindec nagkanayon nga base kini sa memorandum ni LTO Chief Assistant Secretary Edgar Galvante nga pinitsahan og Nobiyembre 11 aron dili mabug-atan sa gasto ang mokuha og lisensiya, gawas pa, ang LTO 7 lang maoy bugtong regional office sa nasod nga nagpatuman sa mandatory drug test requirement tungod sa temporary restraining order.

Ubos sa Republic Act (RA) 10586 o ang Anti Drunk and Drugged Driver Act of 2013, ang mandatory drug tests alang sa pagkuha lisensiya giwala na. Sa samang tuig, ang mipasaka sa korte nga nagkuwestiyon sa pagwala sa drug testing misibog usab sa iyang kaso batok sa kanhi Department of Transportation and Communications ug karon Department of Transportation (DOTr).

Wala dayon kini mawagtang sa LTO 7 tungod sa sa bentaha sa paghashas nga walay adik nga drayber apan, alang sa ubang maayong lungsoranon, dugang hasol ug balayrunon labi na sa mga kabus nga buot mokuha og lisensiya aron makamaneho og sakyanan.

Hinuon, dili kasegeruhan nga tungod sa drug test sa pagkuha og lisensiya, wala nay drayber nga tiggamitan og gidiling drugas. Ang mga nagbisyuso sa drugas maayo mopalusot o mobalik human sa ilang naandan human mopasar sa drug test.

Sugyot na lang sa LTO nga ang tanang mokuha og lisensiya papirmahon og waiver o kasulatan nga andam sila mosumiter sa kaugalingon sa libre apan kinalit nga drug test sa operasyon sa ahensiya matag-karon-ug-unya sa kadalanan.

Diskarte alang sa good news sa LTO.