Dunay tulo ka mga dapit sa Lalawigan sa Sugbo nga pilot sa pagpabalik sa face-to-face classes sa Department of Education (DepEd). Duha sa mga tunghaan puro naa sa mga isla samtang ang usa sa bukiran sa lalawigan.

Gusto sa DepEd nga hinayhinayan na ang pagpabalik sa mga klase human sa dul-an duha na ka mga tuig nga nahunong tungod sa pandemic. Nag-antos ang mga magtutudlo ug ginikanan sa module nga klase sa pagtudlo. Samtang ang pribadong mga tunghaan nagpahigayon og online classes.

Bisan kon face-to-face ang mga klase, apan limitado ang makasulod sa classroom ug mubo ra sab sa ang oras sa pagtudlo. Matawag nga mixed sa face-to-face ug modules ang paagi sa pagtudlo.

Angay nang palapdan sa DepEd ang mga klase sa mga tunghaan nga nahimutang sa mga dapit nga dunay ubos kaayo og gidaghanon o way gyuy mga kaso sa coronavirus disease (Covid-19). Duna man gyuy mga dapit nga wa masudli og Covid o minos ra kaayo ang mga kaso.

Kadaghanan ani nga mga dapit naa sa bukid ug medyo isolated.

Aron seguradong protektado ang kabataan, ang mga magtutudlo nga nagpuyo sa laing dapit papuy-on og pipila ka buwan human ipailawom ug negatibo sa swab test ingon man bakunado. Pagahatdan lang sa ilang mga panginahanglan.

Di karon ordinaryo nga panahon busa nagkinahanglan usab og di ordinaryong solusyon. Gikinahanglan ang pagsakripisyo di lang sa mga magtutudlo, apil na ang DepEd ug komunidad.

Nunot sa pagsakripisyo, hatagan og mga insentibo ang mga magtutudlo nga nagsakripisyo usab, sama sa gidawat sa mga healthcare worker.

Kon kini ang buhaton sa DepEd, hinayhinay nang makasugod sa klase ang mga dapit nga lisod o way signal sa cell phone. Mas makaluluoy baya sila itandi sa kabataan nga naa sa kinapusoran sa mga lungsod ug siyudad.

Hinaut nga magmalampuson ang pilot classes aron mabalik na sa “normal” ang tanan.