Bisan kon hapit na magduha ka mga buwan sa pagpamakuna, duna gihapoy mga medical frontliner nga nagdumili sa pagpabakuna. Sa Dakbayan sa Lapu-Lapu, matod sa ilang City Health Department, naa sa 30 porsyento ang wa magpabakuna. Busa, inay huwaton, nakahukom sila nga sugdan na ang pagpamakuna sa mga senior citizen karong semanaha.

Sakto baya ni nga hukom sa local government unit. Ngano mang huwaton ang di gusto, nga naa may daghang nag-atang nga nanginahanglan kaayo? Ang kapaspas sa pagpamakuna magpakusog usab sa ekonomikanhong recovery human ang ekonomiya nga nagusbat tungod sa mga lockdown.

Sama ra sab ni sa pagsige og huwat sa mga LGU sa mga bakuna gikan sa nasudnong kagamhanan. Una pa sila mamalit og bakuna batok sa Sars-CoV-2 hangtod nga mahurot ang doses gikan sa nasudnong kagamhanan.

Apan kapila na ba magsige og balikbalik si Presidente Rodrigo Duterte sa iyang mga national address nga way bakuna nga mapalit ang nasudnong kagamhanan. Sa ato pa, magsalig ang kagamhanan sa libreng mga bakunang donasyon gikan sa Covax facility nga gidumala sa World Health Organization. Nisaad usab ang China og 25 million doses sa Coronavac, iya sa Sinovac.

Kon maghuwat ang mga LGU sa mga bakuna nga ipang-apod-apod sa nasudnong kagamhanan, kanus-a pa kaha sila makasugod sa pagpamakuna sa general population? Kon hinay ang pagpangabot sa mga bakuna gikan sa international donors, hinay usab ang pag-irog sa pagpamakuna sa ilang mga lumolupyo.

Kay nag-agad man ang economic recovery sa kapaspas usab sa pagpamakuna, hinay usab ang pagbangon sa ekonomiya.

Di ba maayo nga ang mga LGU na mismo ang mamalit og bakuna, di na mag-agad sa Malakanyang? Ang paghatag og gahom ni Duterte sa pribadong sector sa pagpalit og mga bakuna bisan pila usa na ka indikasyon nga di angay huwaton ang nasudnong kagamhanan.