MAHIBAW-AN sunod semana kon unsa nga status ang Dakbayan sa Sugbo ug kanait nga mga siyudad, magpabilin ba sa general community quarantine o mag new normal. Matod ni Police Regional Director Brigadier General Albert Ignatius Ferro nga ang kapulisan andam sa bisan unsay hukom sa national Inter-Agency Task Force (IATF).

Kon mag new normal, andam ang kapulisan sa pagpatuman kon dunay luwatan nga guidelines ang kagamhanan. Tumong sa pagpaluag pa gud sa mga quarantine status mao ang pagpabangon sa ekonomiya nga naigo og maayo sa epekto sa quarantine.

Minilyon ka mga tawo ang nangawad-an og trabaho sa tibuok nasod tungod sa pagpanira sa daghang mga kompaniya ug kadtong nag downsize sa gidaghanon sa ilang mga trabahante.

Bisan tuod kon minos na ang mga kaso sa coronavirus disease (Covid-19) sa tulo ka mga siyudad sa Metro Cebu, di pa panahon karon nga moambak ngadto sa new normal ang highly urbanized cities.

O kon mag new normal man, sakto si Ferro, kinahanglan nga hugot gihapon nga ipatuman ang mga health protocol sama sa compulsory nga pagsul-ob og face mask, face shield, social distancing ug uban pa aron malikayan ang pagsaka og balik sa mga kaso sa Covid-19.

Mahimo man nga dugangan pa ang public transport nga magkuwang matag peak hours aron mapatuman ang social distancing sa pampublikong mga sakyanan. Duna nay mga bus sa nga magbiyahian sa lalawigan sa Sugbo nga gikataho nga wa na mosunod sa social distancing protocol. Duna nay nagbinarugay kay lagi nagkuwang ang public transport matag weekend nga maoy ting-uli.

Bisan pag naa sa new normal, gikinahanglan nga ang mga health protocol magpabilin ug himuon pang mas estrikto. Bag-o pa lang nga nakalingkawas ang Cebu City sa pagsulbong sa Covid. Busa, kinahanglang hinumdoman kini kanunay sa mga Sugboanon. Never again, Covid-19.