PLANO ni Mayor-elect Edgardo Labella nga bayran ang nahabiling utang sa Cebu City gamit ang P8 bilyunes nga pasiunang bayad sa tulo ka developers nga nakapalit og mga luna sa South Road Properties (SRP).

Sud na sa pipila ka mga tuig ang kwarta nga natulog lang sa banko samtang ang Kagamhanan sa Siyudad nagkapuliki sa pagtigom og salapi nga gastuhon alang sa mga batakang serbisyo. Naa na may kwarta, nganong di man gastuhon, inay pakatulgon?

Daghan kaayo og problema ang Siyudad. Bisan sa paninguha niini, makita gihapon ang nagkatag nga mga basura. Daghan gihapong mga netizen ang nangreklamo sa kahugaw sa kadalanan.

Ang suliran sa baha nga nagbalikbalik lang kada panahon sa ting-uwan. Naandan na gani nga meme sa social media ang baha nga gihimo na lang nga kataw-anan aron maibanan ang kaguol ug kalagot sa publiko nga nag-antos na niini sud na sa duha ka mga dekada.

Wa pay labot ang gubaong mga dalan nga iyaha unta sa Siyudad, apan wa kaayo matagad.

Makaabag usab unta ang Siyudad sa pagpalit og mga firetruck aron idugang sa pwersa sa Bureau of Fire Protection (BFP) nga nagkinahanglan kaayog abag sa local government units (LGU).

Daghan pa kaayo og mga suliran ang Siyudad nga nagkinahanglan og atensyon og pundo. Ang halin unta sa SRP dako kaayo og ikatabang kon gigasto pa kini alang sa mga proyekto nga makatabang unta sa pagpaluag sa mga kinabuhi sa mga Sugboanon.

Unsa man diay tumong sa kagamhanan sa pagpangutang alang sa SRP di ba aron mapalambo ang Dakbayan sa Sugbo? Gawas nga makamugna kini og trabaho ug kalamboan, ang kita niini makatabang usab sa panudlanan aron dunay ikagasto sa mga proyekto.

Kon mopuli na si Labella sa ryenda, hinaut pang di siya babagan sa mayoriya unya sa konseho.