Lahi ang Sugbo sa ubang lalawigan sa nasod tungod sa iyang dakong impluwensiya dili lang sa natad sa nasudnong pulitika, lakip na sa mga polisiya gikan sa sentro nga kagamhanan sama sa ulahing kontrobersiya sa protocols sa Mactan Cebu Internatonal Airport (MCIA) alang sa overseas Filipino workers (OFWs) ug returning overseas Filipinos (ROFs).

Kagahapon, Hunyo 29, ang mga miyembro sa Inter-Agency Task Force (IATF) ningtambong sa sisyon sa Probinsiyal Board (PB) ubos sa pagdapit ni Governor Gwendolyn Garcia, kinsa unang gidapit sa hearing sa Senado bahin sa IATF protocol.

Atol sa sisyon, si Garcia nipasabot nga kontrolado ug nagkaubos na ang kaso sa Covid-19 sa Sugbo. Mapahiubsanon siya nga nihangyo sa IATF nga tugotan sa pagpatuman sa nalatid sa iyang Executive Orders (EO) 17 ug 23 bahin sa swab-upon-arrival policy sa MCIA. Dugang sa gobernador, ang iyang polisiya gibalanse bahin sa pagsumpo sa pandemiya, makatawhanong konsiderasyon ug pagpahiuli sa ekonomiya.

Si Gwen nipatuman sa maong polisiya sa MCIA alang sa OFWs ug ROFs apan ang IATF adto na sa ikapito ka adlaw ipaubos sa swab test. Tungod sa panagsumpaki, duha ka hugna gibalhin ang inbound international flights sa MCIA ngadto sa Ninoy Aquino International Airport (NAIA) sa sayong bahin sa Hunyo 2021. Nakamugna og dakong kahasol. Dugang gasto sa mga pasahero.

Ang mga sakop sa IATF namati sa pagpasabot ug hangyo ni Garcia apan wala pay tino nga tubag gikan sa ilang habig. Apan seguragong tukion kini sa task force una mopakanaug og hukom uban sa konsultasyon ni Presidente Rodrigo Duterte kinsa niluwat na og pamahayag pabor sa lagda sa IATF.

Unsay hukom sa IATF sa hangyo ni Garcia, hinaut nga kaayohan sa tanan ug haom sa sitwasyon sa lokalidad. Labaw sa tanan, makatawhanon.