SAYANG. Ganahan ra ba ko unta nga magpulis. Nakapasar na unta ko sa mga written ug ubang mga exams, pero nasango man ko sa height. Wa ko madawat.”

Kini maoy mapaubsanon nga nalitok sa usa ka aplikante sa pagka pulis nga gradwado sa usa ka unibersidad sa dakbayan sa Sugbo, pila ka tuig ang nakalabay.

Human sa upat ka tuig nga sakripisyo sa pagtungha, sa tinguha nga makasulod ug makaserbisyo gilayon sa nasod, porsigido ug wala niya usiki ang panahon sa pagpangplay sa Philippine National Police.

Apan nakawang lang ang tanan niyang panglimbasog ug sa daklit lang napapas ang iyang mga damgo.

Sa niaging semana, nagbansiwag sa radio, TV ug pamantalaan ang balita kalabot sa pagwagtang sa height requirement niadtong mga aplikante sa Philippine National Police (PNP), Bureau of Fire and Penology (BFP) ug sa Bureau of Jai Management and Penology (BJMP).

Kini human nga gipasaka ni Cebu Third District Congressman Pablo John “PJ” Garcia ngadto sa kongreso ang balaodnon nga magtangtang sa requirements sa mga aplikante.

Kon maaprobahan, ang House Bill No. 2242 o naila sa “PNP, BFP and BJMP Height Equality Bill” hayan magpapas na unya kini sa Republic Act 6975 niadtong 1990 nga nagmando nga kinahanglan ang babayeng aplikante sa PNP adunay gitas-on nga dili moubos sa 5’2 samtang 5’4 ang sa mga lalaki 5’4.

Tuyo sa maong balaodnon ang kalantip ug ka matinud-anon na unya sa iyang trabaho maoy angay hatagan ug igong gibug-aton niadtong mga aplikante.

Mag-unsa man nang gitas-on unya dili diay sensiro sa ilang panrabaho ug ang pagbinuang ra alang sa iyang personal nga katuyoan mao ray atimanon.

Mas maayo pa man gani og dunay balaod nga maglimit sa gidak-on sa hawak sa mga pulis.