UBOS ning naglagiting nga adlaw sa summer, mainiton usab ang pagpahigayon sa mga seremonyas sa graduwasyon sa Marso. Mopaso sa ikaduhang tuig sa Senior High School graduates nga giingong andam na modiretso sa trabaho human sa nakatapos sa bag-ong curriculum sa K to 12.

Sa miaging tuig, ang dakong isyu sa unang graduates, sama sa nadandam, ang walay igong kasudlan nga trabaho. Depende sa diskarte sa kompetisyon. Seguradong makakuha ang makanunayon ug taas og pasensiya. Nganong dili nato usbon ang tradisyonal nga hunahuna nga imbes mangaplay og trabaho, magmugna og trabaho pinaagi sa pagsuway sa ginagmay nga negusyo base sa nakat-onan sa tunghaan.

Ang matuod nga edukasyon nag-umol sa pagkamamugnaon ug kahanas sa kapasidad ug abilidad sa mga tinun-an nga pagtubag sa kasamtangang panginahanglan nga nagsamin sa kahimtang sa nasod.

Gawas pa, ang edukasyon gitawag nga bahanding malahutayon human ang kahibalo dili nawala ug dili makawat gikan sa usa ka edukadong tawo. Busa, giisip sa mga ginikanan nga kabus nga bugtong bahandi nga ikabilin hinungdan nga nag-antos sa pagpatulo sa singot aron pagsuporta sa edukasyon sa mga anak.

Ug maong pagtuo dunay kapakyasan. Nasayod kita nga dunay kakuwangon sa trabaho sa nasod hinungdan sa paglangyaw sa daghang graduwado, lakip sa labing maayo o malantip nga produkto. Ang ubang nasod mao ang nakabenepsiyo. Hinuon, usa usab sa hinungdan mao ang pagtanyag sa mga tunghaan og mga kurso nga dili nag-unang panginahanglan sa usa ka agrikultural pa nga nasod.

Kini ug uban pang isyu hinaut nga matubag na sa kabag-ohan nga gipatuman sa programa sa K to 12. Dili kini matuman sa usa ka pamilok lang. Kini ang malahutayong bahandi.