DUNA nay mga dapit sa nasod nga gitumbok nga nakaabot na sa herd immunity. Gitumbok ang 23 ka highly urbanized cities, apil na niini ang mga Dakbayan sa Mandaue ug Lapu-Lapu, nga nakaabot na sa herd immunity tungod sa taas nilang porsyento nga nakab-ot sa immunization.

Saylo na sa 70 porsyento sa target population ang nabakunahan una matumbok ang usa ka dapit nga duna nay herd immunity. Angay bang ikalipay kini sa publiko ug kagamhanan? Angay ikalipay, apan di gihapon angay mokompyansa.

Maayo gani unta wa na lang kini ipahibawo sa kagamhanan. Tungod kay dako ang kahigayunan nga daghan na ang mokompyansa, molugak sa ilang pagmatngon tungod kay duna na lagi herd immunity.

Angay mahibaw-an nga ang silingang nasod, Singapore, malampuson kaayo og vaccination program batok sa Covid-19 kay 88 porsyento sa populasyon nabakunahan. Apan sa gihapon, dihang niigo ang Delta variant, daghan ang nangatakdan, dunay nangaospital.

Sa ato pa, bisan ibutang ta nga ilang nakab-ot ang herd immunity kon basehan ang resulta sa vaccination program, duna gihapoy nangaigo tungod kay di man garantiya nga di matakdan sa virus, labina sa bag-ong variant, sama sa Delta nga mananakod ug mas isog.

Karon lang, gibantayan sa kalibutan ang Omicron, bag-ong variant nga gikan sa African continent ug nagsugod na pagkuyanap sa mga nasod sa Europe. Bisan ang mga tawo nga nabakunahan nangasakit og coronavirus disease 2019 (Covid-19).

Kay di garantiya nga ang tawo nga bakunado di na masakit og Covid kinahanglan nga magbantay.

Busa, bisan naa ka nagpuyo sa Mandaue ug Lapu-Lapu, di gihapon angay nga ikompyansa kay maigo gihapon sa kagaw. Ang nakaayo lang sa bakunado, di grabe ang pagkaigo sa kagaw kay duna na may panagang daan. Mag facemask ug mag social distancing gihapon. Sama sa way herd immunity ang feeling.