DILI normal ug ang mga opisyal sa Sugbo, awtoridad, mga lider sa simbahan ug mga nagpakabanang grupo angay nang maalarma sa sunodsunod nga ngilngig nga panghitabo sa Sugbo o Metro Cebu. Ang taga gawas sa Sugbo nga namati sa mga balita sa radyo, telebisyon ug mantalaan makaingon nga peligro ang Sugbo tungod daghang patay matag adlaw. Apan ang ania naminuyo dinhi murag wala lang? Normal kini nga kahimtang sa dakong dakbayan? Sayop. Kinahanglan nga maatiman, matuki ug kuhaan og leksiyon aron pahimo og solusyon.

Sa dakbayan sa Mandaue, dili pa lang dugay nagsunodsunod sa pagpatay sa iyang kapikas sa kinabuhi tungod sa tumang pangabubho. Sa dakbayan sa Talisay, upat ang patay sulod sa bag-ong natukod nga drug rehabilitation after care center nga giunay sa kaubang pasyente kinsa naghikog usab. Sa Cordova, lungsod diin nabaniog sa cyber pornography nga naglambigit og mga bata, padayong dunay operasyon niini human dunay laing bag-ong nadakpan. Usa ka inahan ang nilawog mismo sa iyang menor de edad nga bata sa law-ay nga buhat sa internet? Abi og napuo na kini tungod sa kadaghan na sa ronda nga gilusad sa dapit. Ug daghan pang ubang ngilngig nga kaso.

Pastilan, ang mga opsiyal sa lokal nga kagamhanan murag walay pagpakabana. Mas nakatitok sa ulang away sa mga dagkong proyekto ug ang nakapait, nanaglumba og bira sa ubos sa paningkamot sa magkaatbang nga partido sa pulitika. Nag-iyahay sa pagduso sa ilang gusto nga proyekto. Tinuod nga dunay dakong problema sa inprastaktura. Apan pwede ba usab nga magdebate sila sa psycho-social nga problema nga katilingban hinungdan sa mga ngilngi nga krimen? Simbako, unya na ba molihok kon kamo mismo ang hingtungdan?

Ang pag-abuso sa gidiling drugas dakong bahin sa nagtukmod sa mangilngig nga krimen tungod sa pagkadaut sa maayong panghunahuna. Dili ba dakong solusyon ang pagsumpo niini?