NAG-unang taho atol ning pagsaulog sa Aldaw sa mga Mamumuo o Labor Day, Mayo 1, mao ang giluwatan nga bag-ong banabana sa poverty threshold gikan sa Philippine Statistics Authority (PSA) nga ang kantidad nga P10,481 isip binuwang kita igo na kini sa pagbuhi sa pamilya nga dunay lima ka mga miyembro.

Nakurat ka ba? Para nimo igo ba kini? Apan ang nagkalainlaing grupo sa pamuo wala makauyon sa naasoy nga banabana sa PSA diin nagpakita sa arang-arang nga kahimtang sa ekonomiya sa nasod tungod sa daghang mamumuo nga nagdawat og suweldo og kapin sa P10 mil.

Gikutlo sa taho sa nasudnong mantalaan ang Trade Union Congress of the Philippines (TUCP) nga nipadayag sa kabalaka sa banabana sa PSA nagpaubos sa wage standards ug nagsanta sa mga mamumuo nga mangayo og umento sa suweldo.

Dugang sa taho, ang militanteng Kilusang Mayo Uno (KMU) nisaway ug nagkanayon nga dili tukma ang pagbanabana sa PSA human wala mokonsiderar sa matuod nga bili sa balay, transportasyon. utilities, health care ug education dihang nikuha sa bag-ong poverty threshold. Labaw pa, ang epekto sa TRAIN law.

Ang labor groups aktibong nagduso sa P750 daily minimum wage gikan sa kasamtangang P537 minimum sa Metro Manila. Dugang sa grupo sa labor, ubos pa gani kini sa P1,000 nga gibanabana nga Family Living Wage (FLW). Managlahi ang minimum wage sa matag rehiyon.

Ang banabana sa PSA importante human posible nga mahimo kining basihan sa wage boards sa nagkalainlaing rehiyon nga dili mopaumento sa wages (inadlaw o inoras nga suholan) ug salaries (fixed o monthly nga suhol) tungod sa daghan ang nagdawat og P10,481 matag buwan.

Klaro nga ang PSA nagdamgo sa ilang pagbanabana. Kitang tanan nasayod sa galastohan.