SA MILABAYNG adlaw, ang Malacañang mipadayag nga ang niaging administrasyon ni Presidente Benigno Aquiño maoy angay basulon niining pagpang-relis sa dul-an 2,000 ka mga binilanggo nga nakonbikto sa heinous crimes.

Gitumbok ni Salvador Panelo, spokesman sa Palasyo, nga sila si kanhi Justice Secretary Leila De Lima nga karon senador na ug kanhi Interior Secretary Mar Roxas maoy naghulma sa implementing rules and regulations sa good conduct time allowance (GCTA) law. Ingon ni Panelo nga kini maoy igong rason nganong nabuhian ang mga binilanggo, lakip na ang tulo ka mga nakonbikto sa kasong pagpanglugos ug pagpatay sa managsuong Chiong niadtong 1990.

Ang GCTA nagpakunhod sa sentensiya sa mga binilanggo nga nagpakita og mga maayong binuhatan sulod sa prisohan.

Kini gisugdan sa pagpatuman niadtong 2014 ug mikabat na ngadto sa 1,914 ka piniriso ang nakabenipisyo.

Sakto si Panelo nga sa panahon pa sa Aquino administration ang pagpasar sa revised nga GCTA law, pero ambot og nganong ipahid man niya sa niaging administrasyon ang sipyat karon.

Dili ang balaod maoy sayop kon dili ang pagpasunod ug pagpatuman man maoy nakahatag sa kontrobersiya.

Klaro ug tataw man nga ubos sa GCTA law o RA 10592 nalatid nga kadtong mga badlungon gihapon sulod sa bilanggoan ug ingon man ang mga nakonbikto sa heinous crime dili makapahimulos niini.

Ug kay dinhi sa Pilipinas, ang pagpatay ug pagpanglugos nalakip man sa listahan nga giilang heinous crimes, tin-aw pa sa bolang crystal nga dili gyud makabenipisyo sila si Josman Aznar, Ariel Balansag ug Alberto Cano, mga konbiktado sa Chiong case kinsa narelis na niadtong Agusto 16. So unsa may sayop sa balaod? Di ba dakong sukwahi man ni sa GCTA law.