ASA ka, mokaylap ang coronavirus disease 2019 (Covid-19) o motumaw ang tumang kagutom? Walay gusto nga masakit ug labaw nang walay gusto og kagutom human kaluha niini ang dakong kagubot. Pareho ang resulta sa duha, patay. Lisod, way hingpit kapilian.

Tungod sa maong sitwasyon, ang mamugnaong hunahuna sa atong mga lider uban sa nagpakabana nga katawhan gikinahanglan ning panahon ning naghinapos nga Enhanced Community Quarqantine (ECQ) karong Abril 28, Martes, dakbayan sa Sugbo.

Susamang kalibog ug pagtuki sa nasudnong kagamhanan ug ubang local goverment units (LGUs) tungod usab sa gikabalak-an nga kagutom. Mga kompaniya o estabilisemento walay produksiyon. Daghang nawad-an og trabaho. Unsa na kaha kadtong kakha-tuka nang daan?

Sa pikas bahin, dakong posibilidad nga modaghan ang kaso sa Covid-19 kon hingpit tapuson ang ECQ. Hinuon, bahin naleksiyon na ang katawhan nga bugtong lig-on nga immune system sa lawas maoy nag-unang panagang sa virus.

Daghan mitumaw nga panghunahuna ug mga sugyot. Usa nagtumaw nga pagpabilin sa ECQ sa pinili nga dunay daghang kaso. Mahimong house o barangay level lang aron makapadayon ang uban sa paglihok sa pagpatuyok sa ekonomiya.

Ug bisan wala na unyay hulga sa Covid-19, ipadayon ang maayong nasagop nga pamatasan sa publiko nga pagpakabana sa kalimpiyo. Inig sud sa trabahoan. malls, dagkong establisemento o sa panimalay mismo, kuhaan kita og temperatura ug manghunaw og alcohol.

Sa gikaingon na, walay hingpit nga solusyon sa sitwasyon karon. Kombinasyon sa mga suhestiyon mao ang ipatigbabaw alang sa kaayohan sa tanan.