NATAY-OG. Nagmasulub-on ang komunidad sa mga magbabalak ug magsusuwat sa dilang Bisaya tungod sa pagtaliwan sa laing kinabuhi kagahapon sa kaadlawon, Martes, Agosto 20, ni Ernesto D. Lariosa o naila sa mga kauban nga si Nyor Erning, usa sa mga lig-ong haligi sa kawsa sa pagpanalipod ug pagpalambo sa pinulongang Bisaya.

Ang mga tinagik nga pulong ni Nyor Erning nakaangkon og daghang pasidungog gikan sa nagkalainlaing lokal ug nasudnong award-giving body lakip sa tinahod nga Palanca Awards.

Si Nyor Erning, retiradong public information officer (PIO) sa National Food Authority (NFA) Central Visayas ug lumad nga molupyo sa lungsod sa San Fernando, Sugbo, maoy nagsuwat sa libro sa kasaysayan sa nahisgotang lungsod ubos sa publikar sa kagamhanan sa Lalawigan sa Sugbo.

Dili usab malimtan si Nyor Erning sa Superbalita Cebu. Nahimo siyang Bisaya language consultant ning mantalaan sulod sa dugayng panahon, human gipasa ngadto sa iyang higala nga kasamtangang consultant nga si Lamberto Ceballos.

Si Nyor Erning usa sa mga pioneer member sa Bathalan-ong Halad sa Dagang (Bathalad), grupo sa lehitimong magbabalak ug magsuwat, nga gitukod sa iyang higala nga si Dr. Mel Allego niadtong Agusto 19, 1969, diin misaulog sa ilang ika-50 nga kasumaran, apan naduhigan sa kasub-anan sa kamatayon sa lubas nga kauban.

Dili mabatbat ang kadako ug kadaghan sa natampo ni Nyor Erning sa kawsa sa panuwat nga Sugbuanon o Literaturang Bisaya nga natuboy ngadto sa taas nga ang-ang sa kalamboan nga haom sa paspas nga tutok sa modernisasyon.

Ug sa dagan sa panahon, daghang batan-on ang nadasig ug naagak sa pagmahal sa Inahang Dila diha sa natad sa arte sa Kulturang Bisaya sama sa kanta, balak, sine, duwa sa intablado ug uban pa.

Nyor Erning, mga pagyukbo. Padayon sa panaw.