BADLUNGON. Nagpakita sa kagahi og ulo ang pipila ka mga Sugboanon bisan pa sa kasuko ug pahimangno ni Presidente Rodrigo Duterte nga maoy hinungdan nga gibalik ang dakbayan sa Sugbo ubos sa enhanced community quarantine (ECQ) tungod sa pagsige og saka sa mga natakdan sa coronavirus o Covid-19. Gani, gipadala ni Presidente Duterte si Environment Secretary Roy Cimatu dinhi sa dakbayan aron sa pagpatuman sa kwarintinas ug pangita og paagi nga mogamay ang kaso sa Covid-19.

Sa miaging semana, dunay gitaho nga naghantak sa Sitio Ulap, Barangay Pardo. Si Pardo Barangay Capt. Catalina Cabardo gipadalhan na og show-cause order nganong di siya pasakaan og administratiba nga kaso sa iyang kakuwang sa pagpatuman sa ECQ sa iyang barangay. Sa iyang pagpasabut sa media, klaro nga si Kapitan Cabardo mitangdo nga dunay nagsige og hantak sa iyang barangay apan wa siya makabadlong o manakop. Matud pa ni Cabardo magsige og balhin-balhin og dapit ning mga sugarol.

Makita sa hulagway nga gipadala ni Atty. Juril Patiño sa CDN nga nagpundok ang nagsugal sa hantak samtang ang uban way saput sa ibabaw. Ang tanan klase nga sugal, legal o dili, nga akong nahibaw-an, magpundok man gyud ang mga sugarol. Ang lagda sa DOH, tungod sa Covid-19, nagdili nga magpundok ang mga tawo tungod kay dali mokatap ang coronavirus. Ang ECQ usab nagdili nga manggawas ang mga tawo sa ilang panimalay gawas kon mamalit og pagkaon ug tambal.

Tungod sa pipila ka lugas mga badlongon sa dakbayan sa Sugbo, naangin ang tibuok taga dakbayan nga karon nag-antos sa kwarentinas. Unya ang kusog nga moreklamo nga way rasyon ang dakbayan nga pagkaon kining way mga trabaho apan dunay kwarta nga ikasugal sa hantak ug tigbakay. Angay nga pahamtangan sa kagamhanan ang tanan nga misupak sa lagda sa ECQ ug sa DOH protocol aron ilang makita nga dili tiaw ning Covid-19.

Kining mga badlongon og maoy mataptan sa Covid-19 ig-adto sa hospital unya mabalibaran kay di pa kritikal, maoy kusog mobagulbul. Maayo unta awaton ni Cebu City Mayor Edgar Labella ang pamaagi ni Davao City Mayor Sarah Duterte-Carpio nga kadtong masakpan nga naglaag-laag unya masakit sa virus, dili hatagan og ayuda sa Dakbayan aron motagam ug magmatngon na.

Kon di pa lang puno ang mga prisohan ug daghan usab ang nataptan nga mga priso ug gwardiya sa Covid-19, angay nga ibalhog sa prisohan ang mga nadakpan nga misupak sa ECQ ug health protocol aron makatilaw og tagam. Angay unta sila nga mahadalok tungod kay ang mga prisohan naigo man sa Covid-19. Anhi nimo makita nga kining mga sugarol o badlongon wa magpakabana sa pandemic.