PARA nako usa ka ginagoy ang kamandoan ni Presidente Rodrigo, sa pagpasira sa Isla sa Boracay nga maoy numero unong tourist destination sa Pilipinas.

Hinanggaw pa gayud. Kay makulban sa ilang kaldero ang gatusan ka mga trabahante nga nanarbaho ug nanginabuhi sa maong Isla.

Kahugaw, kalapasan sa environmental code, ug uban pa mao nga gikinahanglang ipa-ubos sa rehabilitasyon.

Wa gyud ni kasingkasing sa kaluoy ngadto sa mga kabus ang atong presidente?

Ug wa man nato gisupak ang rehabilitasyon basta di lang unta kulban og kaldero ang mga nanginabuhi.

Mahimo man di siraduhan ang tibuok Boracay samtang ipahigayon ang pag-ayom ayom niini.

Tan-awa. Karon mitumaw na hinuon ang mga negatibong komentaryo kabahin sa balita nga ang China mopabarog og casino sa Boracay.

Wa man koy pagsupak sa casino o unsang matang sa negusyo nga sudlan sa China. Sa Hollywood bitaw nakasud naman sa negusyo ang China.

Akong punto ang panginabuhi intawon maapektuhan. Mr. President nakalimot ka sa panahon sa kampanya imong tagaan og trabaho ang way trabaho?Karon imong kuhaan sila og trabaho.

Mobarato ang bugas sa National Food Authority( NFA) sigon sa imong pasalig. Grabi naman kamahal ug wa na gani supply.

Ayaw intawon og pataka, Sir, nahiubos ug nasuko na ang katawhan. Gihimo nimo ang mga saad aron pakyason.

Way lalis nakita man sab sa katawhan ang mga maayong butang nga imong nahimo. Apan palihug ibutang sa imong kasingkasing ang kaluoy.

Mahal na kaayo intawon ang tanan ilabi na ang prisyo sa mga nag-unang palaliton nga maoy gikinahanglan sa mga pobre.

Mao ba kini imong giingon nga change is coming?

Tinuod daghang nalipay sa kampanya batok sa drugas nga usa sa dakong problema sa komunidad.

Apan ang kagutom ug ka lisud magtukmod kana aron mahimugso ang krimen. Hinumdumi ug ayaw kalimti anaa gihapon ang pagsalig sa katawhan diha kanimo.

Dunay apan. Kon mawa na ang pagsalig mao nay dakong problema nga atubangon.

(Email: efren_lonzon@yahoo.com Text: 09235562777)