PARA nako normal lang nga naalarma ang mga ginikanan sa trending karon sa social media sa isyu sa kidnapping.

Dinhi sa Sugbo, mipahibawo gilayon si Police Coronel Giovanie Maines, hepe sa Cebu City Police Office (CCPO) nga way kaso dinhi sa Sugbo.

Apan di kompyansahan kay dunay kaso ngadto sa Manila. Maayo man ganing bitayon ang nadakpan ug miangkon nga daghan sila nga mangidnap.

Kon pwede pa lang, mahimo sab nga luglugon ang liog sa mga suspek ug ablihan ang tiyan aron makatilaw kon unsa ka sakit.

Kay sikat man ang maong balita, gisagulan sab hinuon og pekeng balita nga gipang post pa gyud sa social media.

Ubay-ubay na ang nagpa kisayud sa Agila nga wa sila makatog tungod sa kabalaka sa ilang mga anak.

Linog, bagyo stop!

Nahog nga gibulbugalan ug gikataw-an sa katawhan si Pastor Apolo Quiboloy kay nahunong kuno ang linog sa Mindanao, pag-ingon niya og stop!

Sa tinuod nga panghitabo, way tawo ang makapahunong sa kalamidad. Pwede tingali ang traffic lights sa kadalanan mo-stop!

Karon, gibugalbugalan na sab si Quiboloy nga ipahunong ang bagyong Tisoy nga miigo sa Pilipinas.

Apan di sab nato sila mabasol kay Mao man ang ilang doktrina. Basta pangan na gani sa Ginuo ang gamiton. delikado kay ang uban mahimo nang panatiko.

Bisan og nakasala ug daghang anomaliya sa mga dagko sa simbahan ila pang panalipdan.

Duna gani usa ka impluwensyadong relihiyon sa Pilipinas ang nabu-ak gumikan sa pangurakot sa mga opisyal.

Namiya ang mga tigtudlo sa katungdanan sa ilang simbahan kay ang punoan maoy nangulo sa kahiwian.

Wa nay pundong kuwarta ang panudlanan ug gihimo pang garantiya sa mga loan sa banko ang simbahan.

Ang uban gihimong makilimos ang ilang mga sakop sa mga nagkadaiyang nasud sa kalibotan ug ang dagko nabulahan.

Di ba kaha kini maoy hinungdang nasuko na ang Kahitas-an kay daghan nang pangilad ginamit ang iyang pangan nga si Jesu Cristo? (Email: efrenlonzon71@gmail.com / Text:09235562777)