Dili rason nga ihunong ang modernisasyon sa Philippine Air Force (PAF) kining pag-crash sa C-130 didto sa Sulu sa miaging Dominggo ug usa ka Sikorsky S-70i Black Hawk helicopter didto sa Tarlac pag Hunyo 23, 2021.

Hinuon, rason kini alang sa pagpalit og mas abante pa nga mga kahimanan nga panggugubat labi na nga nagsigi og pabadlong kining mga Insek sa atong West Philippine Sea.

Tinuod, naa kitay kasabutan sa Estados Unidos nga modapig kanato kon mobuto ang gubat tali sa Pilipinas ug Tsina. Apan lahi ra gyud kon naa kitay mga abanteng kahimanan, dili lang kadtong mga second hand nga gikan sa gawas.

Dinhi makita nato ang kahaom sa mga inisyatiba ni kanhi Defense secretary Gibo Teodoro nga gipatuman ni kanhi Presidente Gloria Macapagal-Arroyo ug gipahingusgan pa ni anhing Presidente Benigno Aquino III.

Ang kulang karon, alang kanako, mao ang paggamit sa atong pagdaog sa kasong gisang-at nato kabahin sa atong teritoryo.

Unsaon man sab kining si Presidente Rodrigo Duterte nga nahadlok man moduso sa maong kadaugan kay nahadlok og gubat. Mas maayo pa ang atong mga silingan nga Vietnam, Indonesia, ug Taiwan kay maisogon nga modepensa sa ilang teritoryo. Ambot nganong mahuyang og kalit kini si Duterte sa Tsina ug sa presidente niini nga si Xi Jinping.

Bukog giilogan

Sama sa duha ka managhigalang iro kini si Mayor Edgar Labella ug Bise Mayor Mike Rama. Suod kaayo kini silang duha. Apan itsahi og bukog, sama sa managhigalang iro magpinatyanay kini sila.

Mao kini ang akong nasabtan sa nahitabo sa Cebu City Hall.

Dihang nag-acting mayor kini si Rama, nibuto kining isyu sa basura diha sa Inayawan. Ug nasayran diha sa usa ka special session sa Konseho nga ang P400 milyones nga budget alang sa paghipos og basura sa Syudad sa Sugbo, mga P100 milyones na lang ang nahabilin. Tunga pa gani sa tuig.

Tungod niini ug uban pang posibleng anomaliya, nisulat siya kang John Javier, tag-iya sa Docast, nga nag-kontrata sa paglabay sa basura sa syudad. Apan ang sinaligan sa mayor nga si City Administrator Floro Casas dali kaayong nakaabswelto ni Javier ug sa Docast.

Unsaon nga alang sa kampo ni Labella, gusto man mag-mayor kini si Rama ug malipay nga makakita og mga anomaliya. (DM nako sa @anol-cebu)