KAY abogado ug gani kanhi ombudsman kini si Mayor Edgar Labella, makamao kini modepensa sa kaugalingon ug sa iyang mga sakop batok sa mga isyu. Apan nahibulong ko nganong iya man hinuong giduot iyang mga tigsuporta.

Mao kini ang akong nabantayan kabahin sa isyu sa nawalang manok. Gi-donate man gud kini ug naay mga barangay kapitan nga niingong ilang nadawat ang mga donasyon gikan sa mga nakadawat nga konsehal.

Si Konsehal Raymond Garcia ug Konsehal Edu Rama namahayag sab nga ilang nadawat ang mga donasyon. Nakahinumdom ko nga dihang nahisgutan kini sa Konseho, nakaingon si Bise Mayor Mike Rama nga nahuman na ang maong isyu.

Apan sukwahi sa gipamahayag ni Bise Mayor Rama, nagpadayon man hinuon tungod sa lain-laing kiha.

Pananglitan, diay taga Labangon nga nangayo og klarong pamahayag ni Mayor Labella kabahin sa giingong nawala nga mga manok.

Sa iyang sinulat nga tubag, nagkanayon ang mayor nga wala siyay labot sa isyo kay wala siya mopirma sa pagdawat sa donasyon.

Karon, gikiha na hinuon silang Raymond ug Edu kay nganong nidawat og donasyon imbes ang mayor.

Makaingon kita nga basin dunay pamulitika ang maong kaso kay pirmeng mapahinumdoman ang nakapalit nga gipangkwartahan sila sa ilang mga lider.

Edlab Riders

Daw nakatunong sab si Bambi Beltran dihang nikiha kini kang Mayor Labella tungod sa panagtipon sa mga Edlab Riders.

Diha sa kiha ni Beltran, iyang gisaysay nga si Mayor Labella mismo wala sa maong kalihokan. Apan apil siya sa pag-organisa. Ang mayor maoy naglagda sa balaod nga mag-obserbar sa mga health protocols.

Ug makita sa mga hulagway nga wala gisunod sa iyang mga tigsuporta ang balaod.

Dihang nahimong isyo kini, dali sab kaayo ang mayor nga nakapa-imbestigar sa kapulisan niini. Daw iyang giduot hinuon ang iyang mga tigsuporta.

Dayon, ang uban niyang mga tigsuporta sa social media, niingon dayon nganong gukdon kuno si Mayor Labella nga wala man siya moadto sa maong kalihokan sa iyang mga tigsuporta. (@anol_cebu sa Twitter)