NAAY punto si Konsehal Joel Garganera sa iyang pamahayag nga dili saktong tayming karon ang pagdili sa paggamit sa mga e-scooter kun electric scooter diha sa kadalanan.

Kay nganong did-an man nato ang paggamit og mga klase sa transportasyon ang katawhan karong panahon sa pandemya ug pugson sila sa pagsakay sa mga bus ug kining modernong mga jeep?

Ang importante karon mao nga makatrabaho ang katawhan ug makalihok ang atong mga negusyo. Apan murag wa makasabot ang atong mga opisyal sa kon unsay angay buhaton karon.

Gani, alang kanako, di lang ang mga e-scooter ang tugtan. Angayan sab tugtan karon ang mga PUJ aron mas dali nga makalihok ang atong katawhan. Makatabang pa gyud ang kagamhanan sa panginabuhi sa mga drayber.

Dili angayang gamiton ang pandemya aron maduso ang agenda nga modernization. Pwede man ang modernization iduso inig human sa Covid-19. Nganong gigamit man karon? Ang mahinungdanon karon mao ang panglawas ug ang panginabuhi.

QPASS

Maglibog ko sa atong mga opisyal sa syudad. Gusto sila daygon sa ilang mga tsuwarawarap diha sa social media. Apan gipadayon gihapon ang usa ka butang nga grabing nakadaot sa administrasyon. Mao kini ang quarantine pass.

Tinuod naanad na lang ang mga Sugboanon niining quarantine pass nga kataw-anan ug makadaot sa imahen sa mayor.

Ilang gisiguro nga di gyud malimtan sa mga Sugboanon nga naay quarantine pass nga dako kaayo. Kining maong quarantine pass dunay QR code nga fake.

Kanang QR code man gud nagkinahanglan og QR reader nga nakonektar og usa ka database. Apan nakahibawo na baya kita nga photocopy kun gi-xerox lang kining maong QR code. Dako pa gyud kaayo ang papel. Dayon kay kulang man ang giprenta, pila ka mga pamilya ang magbanos-banos og gamit.

Kon gipangusgan pa lang sa Cebu City Hall ang ilang information drive labi na sa grassroots alang sa panglawas, mas makasalig kita sa katawhan nga mao nay mangunay sa pagsunod sa mga health protocol.

Unsa-on sab nga nanubra ka sensitibo man ang atong mga opisyal. Mas gitan-aw man ang sunod eleksyon kay sa pagsumpo sa pagkatap sa Covid-19.

Kahinumdum mo sa streamer sa pipila ka barangay nga dunay OK. Pila ra man ang nakahinumdom unsa gipasabot anang OK nga gigamit sa panahon ni anhing Serging Osmeña. Sa ka over-acting sa atong mga opisyal, mas nakahinumdom na hinuon karon ang mga Sugboanon. Nakahibawo na sab ang mga millennial.

Alang kanako, importante alang sa atong mga lider nga motutok lang gyud unsaon kining pagpatuman sa atong mga health protocols samtang atong gipa-abli ang atong ekonomiya. @anol_cebu sa Twitter