MAO kini ang adlaw sa Sugbo nga hapit tanan nimong masugatan moingon kanimo og “Pit Senyor.”

Daghan ang wa makasabot. Apan kon maminaw ug mobasa lang, makasabot man kita nga kining maong mga pulong nagpasabot man og “sangpit sa Senyor.”

Ang pista ni Senyor Santo Niño atong gipahinungod alang sa Bata nga si Hesus. Atong pagtuo nga ang atong mga hangyo Kaniya mahatag.

Kining maong pagtuo mas dugay pa sa pag-abot ni Juan Miguel de Legaspi sa 1565.

Matod pa, human namatay si Ferdinand Magellan sa kamot ni Lapulapu, iyang nabiyaan dinhi sa Sugbo ang balaang imahen. Mao kini ang imaheng nakita ni Legaspi nga wala masunog diha sa usa ka balay.

Human sa 17 ka adlaw, napahigayon ang unang pista sa Senyor uban sa mga Katsila ug sa mga taga Sugbo nga nagtuo nang milagroso ang maong imahen.

Sulod sa lima ka sentenyal, ato nang gipahinungdan ang Senyor Santo Niño sa atong pag-ampo ug mga pangaliya.

Magpasalamat kita nga nagpadayon kini sa miaging Dominggo dihang nibisita ang atong Presidente Rodrigo Roa Duterte.

Nalipay kita nga nihatag og igong pagtahod ang atong Presidente sa Senyor ug sa kahulogan sa atong pista.

Ang Sinulog 2020 mao ang kasaulogan sa dili pa ang 1521 nga ensaktong tuig nga nianhi si Magellan.

Tingale, nabalaka lang kita nga kasagaran, di mapugngan sa atong Presidente sa iyang baba. Mahilig man gud kining mobalikas ug dunay mga higayon nga magbinastos na.

Duna say higayon nga iyang giinsulto si Papa Francis ug sa laing higayon, ang atong Ginuo mismo.

Duna kadtoy adlaw nga siya niingon, mas mahinungdanon si Lapulapu kay sa pag-abot sa Kristiyanismo dinhi sa Pilipinas.

Sa miaging adlaw, naghisgot ang atong Presidente kabahin sa pagtabang kanato kabahin sa trapiko.

Pangutan-a lang imong mga tawo dinhi naunsa na ang ilang mga mass transport projects.

Ang ako lang dugang masulti kay kulang gyud ang preparasyon kabahin sa giingong pedestrian traffic.

Taas-taas man gud ang preparasyon kabahin sa seguridad. Nagpasayon pa kabahin sa cell site shutdown. (@anol_cebu sa Twitter)