DAW naay usa ka popular nga presidentiable ang wala makat-on sa mga pagtulun-an sa kaagi sa politika sa Sugbo. Basi kining obserbasyon sa feedback sa mga konsehal nga nakatambong og usa ka asembliya.

Duna man guy usa ka wa mailhi nga personalidad nga nitambong sa maong assembliya isip representante sa maong presidentiable. Ug nakahinumdom ko ni Fred Tuadles, igsuon sa nitaliwan na nga si Arnie Tuadles. Kini man gud ang gihimong lider sa politika ni Fernando Poe Jr. kaniadtong 2004 dinhi sa Sugbo.

Kay walay kasinatian ug wa mailhi sa politika dinhi sa Sugbo, ang Tuadles wala makatabang kang FPJ. Gani, ang mga lig-ong lider nga sila si Gwen Garcia, Junie Martinez, ug John-John Osmeña tuana hinuon kang kanhi presidente Gloria Macapagal-Arroyo.

Sa 2016, naay wa mailhi nga lider si Mayor Rodrigo Duterte. Apan kining maong lider dunay PR agency ug tinabangan ni Lito Banayo.

Wa sab mosalig ang campaign machinery ni Duterte. Nagtukod si Jun Evasco, ang national campaign manager niadtong higayona, og usa ka lahi pa gyud nga campaign machinery dinhi sa Sugbo ug sa Visayas.

Ang campaign machinery ni Evasco maoy nakapabali sa mga Garcia gikan kang Jojo Binay. Kini usab ang responsable sa pagtukod sa “Just DO (Duterte-Osmena) It” parallel campaign dinhi sa Syudad sa Sugbo.

Ang campaign machinery ni Evasco maoy nagsiguro nga dunay mga watcher ang mga presinto ug nag-mobilize og kapin sa 100,000 sa miting de avance diha sa SRP. Kini ilang gibuhat samtang ang grupo nilang Michael Dino tua nagpasipsip sa Miting de Avance ni Duterte sa Luneta.

Karon, daw dunay wala makat-on sa kasinatian sa politika sa Sugbo.

BAKUNA

Dihang gisaway si Presidente Duterte nga walay nahisgutang stratehiya batok sa Covid-19 diha sa iyang State of the Nation Address (Sona) sa miaging Hulyo, masuk-anong nibutyag kini sa iyang plano kabahin sa bakuna.

Bulan sa Hulyo pa kini. Ug nagtuo ko nga seryuso ang Presidente kabahin niining maong stratehiya.

Apan naunsa ba nga naiwit na man hinuon kita sa pag-apod-apod sa bakuna kon itandi sa ubang mga nasud. Nag-una pa gud kanato ang Singapore ug ang Indonesia sa pagpalit sa mga bakuna gikan sa Pfizer.

Dayon, ang Vietnam dunay gipaabot nga iyaha mismong lumad nga bakuna. Samtang kita naghulat sa hinimo sa Tsina nga moabot karon pang Marso 2021.

Ug masub-anon akong nagsud-ong sa nasudnong lalis karon kon tinuod bang tungod kining maong kahimtang sa kabanga ni Health Secretary Francisco Duque nga giduphan ni Presidente Duterte ug sa iyang loyalist nga si Presidential Spokesman Harry Roque. (@anol_cebu sa Twitter)