Si kanhi House Speaker Allan Peter Cayetano ug ang iyang nga kaalyado, misang-at og balaudnon nga maghatag og cash incentives o hinabang o ayuda ngadto sa halos tanang sektor sa katilingan aron makasugakod niining kalisdanan karon nga mugna sa coronavirus disease (Covid-19) pandemic. Morag nahulog ni nga extension sa Social Amelioration Program (SAP) nga gihatag sa nasudnong kagamhanan sa 2020 nga nagkagubot ug gisanapan og mga anomaliya.

Sa ilang balaudnon nga gitawag og Bangon Pamilyang Pilipino, ang mga pamilyang apektado sa pandemya makadawat og P1,500 matag individual o P10,000 sa tibuok pamilya o asa ang labing dako. Ug ang mga kuwalipikado: poorest of the poor o pinaka-pobre, senior citizens, persons with disability, solo parents, displaced o retrenched workers o nawad-an o natangtang sa trabaho, medical frontliners, pamilya sa overseas Filipino workers, wala makadawat og hinabang gikan sa gobiyerno pagsugod sa pandemya, mga tawo nga naghupot og national ID system ug vulnerable sectors.

Morag halos tanang sektor ni. Unsa man si Cayatano modagan pagka-presidente? Sayon ra lagi ni estoryahon. Apan aduna bay igong pundo ang kagamhanan alang niini nga puwerting dakoa sa gahin? Unya panahon sa hinatagay, dili kaha ni magkagubot na pod ug sanapan og anomaliya sama sa nahitabo sa SAP? Kasaligan ba ang mga pulitiko nga maoy mogahin ug ang taga executive department sama sa DSWD nga moapod ani?

“Tell a lie once and all your truths become questionable.” Ambot naa ba kahay Pinoy nga pulitiko nga makapasar ning maong sukdanan. Kining pagtukod og trust o pagkakasaligan sa tawo nanginahanglan og hataas nga panahon sa pag-gambalay apan kadyot ra mabuak sa usa lang ka pagpamakak.

Subo kaayo palandungon bisan kaha di tanan apan kasagaran sa atong mga pulitiko di kasaligan. Mismo si Sen. Manny Pacquiao miangkon nga daghang corrupt nga mga pulitiko. Ug mao nga tingali hilabihan ka husto ang katarong sa sugyot ni Kong. Cayetano. Salbaron ang katawhan gikan sa kakabus pinaagi sa cash assistance. Apan sugyot nga atong dawaton nga matod pa sa Eninglis nga ‘with a pinch of salt.’ Buot ipasabot nga atong dawaton apan “ato unang inudnod sa asin aron molami.”